曾志偉指TVB藝人相繼離巢係必然現象 回應親吻模特兒一事

曾志偉

曾志偉於2021年1月重返TVB,同年9月升任節目內容營運總經理,負責TVB主要內容營運,包括綜藝、合拍劇、音樂各類內容嘅製作,以及節目採購及策劃。上月底,曾志偉出席新加坡一個活動接受現場媒體訪問時否認TVB收視下降,又回應去年10月親吻馬來西亞性感女模一事。

TVB收視率被指大不如前,去年7月更宣布調整收視公布方式,發新聞稿表示廣大觀眾唔再局限於透過傳統電視觀賞節目,而係會使用多種媒體平台瀏覽,故每周發放嘅收視率已不合時宜,未能完全反映實際情況。曾志偉亦於新加坡活動上回應:「年輕人有好多觀眾都唔習慣喺電視上睇節目,好多都係喺網上及手機睇,所以搵唔到收視率,但其實觀眾並無流失。」 又表示TVB於香港有83%觀眾,係全港最厲害嘅平台。被問到點睇TVB藝人近年相繼離巢,曾志偉就表示係一個必然現象,仍會不停培養人才:「TVB係創作人才嘅地方,現時有好多超級巨星及電影明星都係TVB出身,周星馳、劉德華、周潤發都係訓練班出身,郭富城、黎明都係我哋嘅舞蹈員或者係從音樂比賽出嚟,一級女明星都係從香港小姐選舉出嚟,所以TVB培養好多人,每年培養咁多人,佢哋慢慢成長就會流去電影或者媒體。」

當地記者問及曾志偉對於去年10月親吻馬來西亞模特兒黎峇菈(Lebara)一事報導嘅睇法,曾志偉回應指當時只係親對方臉頰:「其實我只係親佢臉頰,但抽出嚟嘅畫面好似係親嘴嘅樣子,你覺得從中抽一個出來就係真?所以只係一個禮貌性嘅birthday kiss,你覺得呢個係一個新聞嗎?」曾志偉亦認為自己係公眾人物,先會被人如此報導,指食得鹹魚抵得渴;對於平日嘅負面新聞,佢就表示:「宜家好多報導都係假,如果介意每個新聞報導的話,就會生活得好辛苦。」最重要嘅係家人如何看待佢嘅人品,觀眾點睇佢並唔重要。

《開心無敵獎門人》截圖
《開心無敵獎門人》截圖
《開心無敵獎門人》截圖
《開心無敵獎門人》截圖

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!