曾志偉生日被薛家燕肥媽獻吻 嚴刑逼供家燕姐男友背景

曾志偉於今日（14日）正式踏入70大壽，身為TVB總經理（節目內容營運）、又喺TVB工作多年嘅佢深得台前幕後尊重，日前一班藝人同事就為曾志偉舉辦驚喜生日會，TVB助理總經理樂易玲、薛家燕、肥媽、黎諾懿、洪永城、劉佩玥、馮盈盈、吳若希、江嘉敏、朱凱婷、宋宛穎等眾多藝人現身祝賀，似足台慶咁熱鬧同大陣仗。一班人大唱生日歌、切壽桃蛋糕之外，多位女藝人仲獻吻祝賀，曾志偉擺出一副冧樣，講笑咁話：「唱完生日歌之後呢，得到一個過百歲嘅kiss！」到底係咩意思呢？

事源就係，曾志偉於接受訪問期間，不斷有女藝人衝上前獻吻，包括林秀怡、吳嘉儀、吳幸美、朱凱婷等等，而73歲薛家燕及69歲肥媽都唔執輸，左右夾攻錫落曾志偉塊面到。對比薛家燕，肥媽就相當肉緊，一邊錫一邊捉實曾志偉二頭肌近膊位置，曾志偉表現陶醉，更笑言：「未試過...夾埋百幾歲嘅兩個人錫我，仲有人妻、人媽、祖母級都有，唔使洗面啦！」肥媽亦補充自己與薛家燕加埋應該差唔多150歲。

雖然薛家燕當時無肥媽咁肉緊，只係搭住曾志偉膊頭，但就搞笑向曾志偉表示：「曾總，我同你講，我好耐冇錫過男人。」結果，被肥媽爆佢講大話，明明就有男朋友；曾志偉隨即嚴刑逼供，叫薛家燕自爆男友身份，當係送畀佢嘅生日禮物：「我覺得呢個時候係你承認佢嘅時候。」薛家燕承認：「我，我嘅朋友，佢嗌我呢今日就唔好飲咁多酒！」曾志偉又指自己嘅生日願望就係薛家燕講出男朋友係邊個，薛家燕最後只好自爆對方細過佢。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！