曾擁500萬粉絲 內地網紅仲尼峇里島遇溺身亡 烏克蘭籍妻獲救

內地網路瘋傳，內地網紅仲尼同烏克蘭籍太太卡琳娜，日前喺印尼渡假勝地峇里島一個海灘被巨浪捲走，34歲嘅仲尼不幸遇溺身亡，太太就獲救。

根據印尼媒體報導，當地星期二（7日）下午，一名34歲中國籍男子同烏克蘭籍太太喺一個海灘嘅禁止進入範圍被浪捲走。烏克蘭籍女子事發後獲救，但其丈夫就失蹤。到星期三（8日）上午，救援人員搵到遇溺男子屍體。據知，印尼當局確認死者護照上嘅名字，同仲尼原名黃小灃嘅英文譯音相同，而且出生日期及居住地都同仲尼一樣。網民因此估計仲尼不幸遇難，而出事當日更是仲尼34歲生日。仲尼所屬公司嘅職員回應時表示，佢地至今都未能聯絡到仲尼。

仲尼曾以裝扮不同動漫人物而成名，喺內地嘅微博有540萬人追蹤。2015年仲尼喺相親節目認識烏克蘭籍網紅卡琳娜(Karina Melnychuk)後交往，2016年結婚並誕下一女。但去年中仲尼被爆偷食另一女網紅，再被指控原來係慣犯，形象一秒破產。及後2人公開宣布將社交帳號注銷，並會暫停活動以修補關係。到今年9月，仲尼先至同老婆拍片分享二人坦承面對婚姻問題嘅過程，但係估唔到2個月後仲尼就出事離世。