曾直播藝人老婆生仔惹非議 TVB旗下Big Big Channel 5月停運

2017年TVB建立嘅影片及社交平台Big Big Channel，宣布喺今年5月2日停止服務。

近年網路廣告市場越做越大，TVB為咗幫旗下藝人開拓呢個市場，於是創立Big Big Channel，一手包辦平台營運及內容供應，而且旗下藝人本身有電視台幫助入屋谷起知名度，更加可以令佢哋做埋KOL，透過直播、帶貨等途徑搵錢。

Big Big Channel 手機app喺2017年7月推出，剛開始時有唔少藝人都會喺上面做直播，而TVB亦會幫藝人拍片放上Big Big Channel，曾經搞過藝人麻雀王大賽、妝速挑戰賽等專屬節目。而TVB亦推出唔少節目力谷，相信唔少觀眾都認得嗰隻代言ICON「大明猩」。另外部份TVB劇集片段亦會放上Big Big Channel 做宣傳。

不過Big Big Channel 亦引發過爭議，人稱「一蚊Joe」嘅游莨維就喺平台推出初期，趁老婆入產房生仔時做直播，直到BB出世都仲拍緊，影埋剪臍帶先cut。而喺2018年8月，當時仲係TVB藝人嘅余德丞踢波昏迷被送入醫院ICU，Big Big Channel 就派員喺ICU門口做直播，同樣備受爭議。

而通訊事務管理局喺2018年6月，以TVB安排節目間接宣傳Big Big Channel嘅手法，混合廣告及節目內容而接獲投訴，決定向TVB罰款30萬元。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！