最激環保影帝 祖昆馮力士拎完獎去示威 企前線被警察拉

早幾日新版《蝙蝠俠》電影預告片出爐,觀眾除咗想知新任蝙蝠俠 Robert Pattinson能否擔大旗之外,更加想知「小丑」一角會唔會出現。

因為飾演小丑而首奪影帝嘅祖昆馮力士,演戲以外亦都關注環保議題,仲親身落場參與示威,算係荷里活明星當中行得最前嘅一批,仲試過做「前線巴」俾人拉!

祖昆馮力士細個睇見漁夫劏魚前將魚掟埋牆深感震撼,因此決定食素,近年更積極參與動物權益活動。祖昆馮力士自言,選擇食素係出於對動物嘅惻隱之心,唔想佢地受痛苦,而且認為畜牧業對地球生態有好大影響。

舊年年頭嘅頒獎禮季節,祖昆馮力士憑住《小丑》捧走多個大獎,喺金球獎嘅頒獎台上,佢致謝詞時公開感謝大會提供全素食物;而喺美國演員工會頒獎禮之後,祖昆馮力士並冇參加派對慶祝,反而係著住套禮服去到動物屠宰場參加示威!

而喺舊年一月拎完金球獎之後冇耐,祖昆馮力士同多位影星一齊出席華盛頓一個關注氣候變化嘅示威,並且喺台上發言,事後被當地警方以「擾亂公眾秩序」拘捕,不過好快就獲釋。

敢言嘅舉動並無影響祖昆馮力士嘅事業,依然有唔少大片有佢份,好似大導列尼史葛就搵祖昆馮力士拍新片Kitbag,飾演法國傳奇人物拿破崙。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!