《有乜好過去camping》首播 潮玩露營車 十大露營車貼士

大台新節目《有乜好過去camping》今日首播，三位主持梁烈唯、唐詩詠同馬國明帶大家Car camping遊德國嘅天鵝堡、阿爾卑斯山呢類靚景。近年，露營車愈黎愈流行，大家可以慳返住宿費，起居飲食同交通都靠曬架露營車，簡直就係一車走天下，但方便還方便，以下Car camping十大貼士，睇咗先好出發啦！

1. 水源
去到荒郊野外嘅露營地方，好多時都冇水源供應，靠自己拎去。有時露營人士帶足夠水去飲用，但就忽略咗煮食、清潔、甚至沖涼同急救都要用嘅水。建議按個人需要而帶兩倍嘅水，或者去之前，了解營地有冇水源。香港有部份露營營地係有乾淨食水供應。

2. 急救包
帶備急救包，以防萬一。應該要有一般急救用品之外，可以按個人需要添加，亦可以按目的地環境而定。

3. 遠離火種
露營要煮食、照明或營火會，都要生火，但要確保火種穩定同安全，唔會一陣風就吹咗啲火去第二度，燒傷自己當然唔好，更可能引起山火。

4. 食糧
足夠食糧好緊要，露營係會離開城市便捷嘅環境，唔會「實有間喺左近」。除咗按人按餐次計劃，亦要預備後備同緊急食糧。擺放同保存食物都同樣重要，留意食物會唔會因為天氣炎熱而容易變壞，或會唔會融化等情況。

5. 收細音量
三五知己難得露營，開行音樂，氣氛的確唔錯。但要留意，音浪會唔會騷擾到附近嘅人士，或者破壞咗環境嘅寧靜，甚至有時會嚇走啲難得一見嘅野生動物。

6. 多帶生火器具
裝備齊全，食物都好妥當，要開爐煮大餐果陣，先發現唯一一個打火機竟然跌咗、壞咗、爛咗、塞咗、冇gas等等，到時真喺唔知點算好。提醒多帶生火器具，安全起見，可以用密實袋裝好，以免濕水浸壞。

7. 留意天氣
露營好睇個天，出發前一定要睇睇天氣預報，如果計劃露營幾日的話，又明知會陰天有雨的話，要做好長留帳篷入面，冇得出去嘅心理準備。亦都唔建議連日大雨之後嘅一兩日出發，因為山路草坪可能出現積水難行，唔安全亦都唔過癮。

8. 檢查帳篷
強烈建議，就算去唔去露營都好，都要定期檢查下個帳篷，大家都應該好有經驗，有啲嘢擺得太耐，真係會擺到爛，發霉、拉鍊拉唔郁都有可能，出發前就更加要檢查一次，萬一去到先發現爛咗、穿咗個窿，到時點瞓呀?

9. 四驅車
平時揸車的確冇咩必要用到四驅推動，但去到郊區，或去緊露營途中，有可能經過比較崎嶇嘅路段，有機會駕車會陷入爛泥、碎沙石等，四驅車會較為容易解決到以上情況。

10. 掛起食物
夜晚最好將食物掛起離地三、四米嘅位置，可以的話，用密實盒、密實袋包裝好，因為夜晚會有好多昆蟲、動物去偷食你啲食物，而且掛喺帳篷以外位置，因為有外國經驗，有熊入去帳篷入面搵嘢食。

相片來源：cayt-who @Tumblr