有線VJ女神Monique歐綺霞成凍齡闊太 曾被余詠珊嫌老雪藏

有線電視早前宣布向政府交還收費電視牌照，完成近30年嘅歷史任務。Cable雖然唔係免費台，但最高峰時期都有110萬客戶，90年代主打年青人市場嘅YMC台，更加開闢咗新戰線，一班VJ都有唔少fans。近期有網友提起有線經典，不約而同講起當年YMC台女神Monique(歐綺霞），佢仲「上水」留言感謝網友仲記得佢。

Monique 90年代參演過多個MV，同劉德華合作後被導演介紹加入YMC台，好快就成為台柱之一，主持熱門節目《青年人民大會》甚受歡迎，曾被稱為「有線一姐」，甚至連TVB都想撬佢過檔。但係Monique寧願留喺有線做一姐，都唔想過大台同人爭，於是多次甩底唔同TVB傾約。

不過YMC台喺2000年開始縮短播放時間，Monique出鏡機會亦都被減少。後來，曾經做過亞視嘅余詠珊加入有線，並對YMC台開刀。Monique曾經喺一次專訪憶述，當年余詠珊以「一代新人勝舊人」為由，認為用三個新人頂起Monique仲划算，令Monique醒覺「一姐」只係銜頭，到2001年佢決定離開有線。

失勢之餘，Monique爸爸生意失敗破產，連帶媽媽亦患病，佢要一個人撐起頭家，當時先識得後悔冇入大台。後來Monique幕前工作越來越少，但就因為朋友介紹而認識富商Tim並開始交往，婚後更加過住悠閒日子。而家Monique即使就快50歲，睇落仍然keep得好好，凍齡工夫十足。

當年Monique索到爆，情史都相當豐富。有傳Monique同有線同事衛志豪拍拖多年，後來被爆原來曾經同過張衛健短時間一齊過，而同張衛健老友鬼鬼嘅蘇永康，亦曾經被拍到同Monique喺車上激咀。另外喺2004年Monique又被傳媒影到街頭激咀富商後人，印象一落千丈之下，Monique索性唔做幕前。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！