【本地行山】大圍出發遊下城門水塘 超大草地睇人放飛機

講起行城門水塘，大家可能都會諗從荃灣方向出發，不過今次介紹係下城門水塘，出發地點位於大圍。下城門水塘建於1961年，今次路線會去到香港最著名玩模型飛機地點，而且全程石屎路，非常易行，一家大細都無問題。

大圍站出發 補給無難度

大家可以由大圍站出發，於附近先購買糧水，甚至食下嘢先出發，之後全程無補給站，大家要注意。於大圍站G出口，一出前面就係「積運街」，沿住行人路一直行就會出現一個迴旋處，請往「富山」方向走，呢條就係「下城門道」，呢度開始會係一條長命斜，亦可以算係全程最辛苦地方。行大約10分鐘，經過「寶福紀念館」，右手邊就係一大片草地，已經進入下城門水塘範圍，再走一陣會見到一個小水池，就係水塘排水閘，用作防洪之用。此處向上望已經可以見到下城門水塘嘅水壩，只要往上走就到達！

雄偉水塘為三級歷史建築

下城門水塘唔單止係用作水塘，其實本身都係一座三級歷史建築，水壩上長約230米道路，可以走於上面一次過欣賞雄偉水塘全景，對於有車一族又唔想行嘅朋友，其實係可以直接開車前往，唔少人仲泊低車於水壩路上先出去玩，不過當然屬違法行為啦！水塘下面就係一大片草地，由於地域空曠，加上附近無任何禁飛區，因此成為模型飛機發燒友聚集點，大家去到呢度簡直尤如參觀「航空展」，欣賞各種各類模型機、航拍機等，都算一大奇觀。

前往城門峽 城門隧道盡現眼前

影完相，繼續由大壩上道路前走，左手邊就可以行一條小行人路，一樣全程石屎路好易行，兩邊都有大樹，大熱天行都唔會暴曬，途中都可以繼續欣賞唔同角色嘅下城門水塘景色，而好多附帶建築包括鐘形溢口水閘、水掣塔等，同樣都係歷史建築，好值得影相留念。行大約半個鐘，有上斜有落斜嘅路段後，當開始聽到有汽車聲，就表示快到目的地城門峽。行多一陣，終於見到兩天行車天橋出現於眼前，非常壯觀，原來就係平日城門隧道兩條隧通之間嘅行車天橋，估唔到原來可以由呢個角度睇到城門隧道呢！

直穿上城門水塘

睇完橋底景色，沿著藍色欄杆一直走，就會見到一條鐵梯往上，原來行上去就會豁然開朗，就係大家熟悉嘅「上城門水塘」，如果今次目的唔係睇埋上城門水塘的話，大可沿著水塘邊行多15分鐘左右，就會去到菠蘿壩，此處就有小巴可以直接出返荃灣，非常方便。

路線：大圍站>積運街>下城門道>下城門水塘>城門峽>上城門水塘>菠蘿壩

全程：約5公里

需時：5小時（連休息時間）

難度：初級

來回交通：港鐵及小巴