本尊就位｜《愛·回家》演員頻出現？甄采浠升呢女二旗袍亮相被讚保養得宜

由孔德賢、謝東閔、陳嘉慧主演嘅TVB劇集《本尊就位》正熱播，講述在民國時期，一名冒充道士嘅騙子陳木昆（孔德賢飾），因一次禍事逃亡至五族房鎮。同時，木昆冒用道教名仙呂洞賓之名詐騙觸怒呂洞賓（謝東閔飾）本尊，促使佢降臨人間懲處木昆。一系列意外後，洞賓喪失法力，不得不留在人間。之後，洞賓化名雷石，決定陪伴木昆，引導佢走向正道，在此過程中仲解決咗許多村中奇案。劇情節奏明快輕鬆，深得觀眾喜愛，上周（1月29日至2月4日）收視最高20.6點（134萬觀眾收看），成功擊敗《狀王之王》。

《本尊就位》男女主角陣容新鮮，但由於監製係《愛·回家之開心速遞》監製，所以劇內都隱藏咗唔少《愛·回家之開心速遞》嘅演員，仲要飾演妓女，例如媽媽生「群姐」許思敏、重磅妓女「池美麗」鍾凱琪、「高小姐」甄采浠、「三太」樊亦敏、劉嘉淇、黃子桐、張盈悅等等；不過，所飾演嘅角色性格則有所不同，例如樊亦敏於《本尊就位》飾演一名惡妻，與《愛·回家》千依百順性格並唔相同；張盈悅於《愛·回家》飾演怪雞秘書Fanny，於《本尊就位》就飾演青樓女子，打扮如同婢女一樣；至於喺《愛·回家》飾演高小姐嘅甄采浠（Carisa）於《本尊就位》就升呢做女二，出演妓院老闆娘歸二娘，近乎全程以旗袍造型上陣，被大讚43歲都保養得宜。不過，甄采浠仍表示自己身形未夠完美。

甄采浠平日透過負重、帶氧運動、戒糖及均衡飲食以保持身材，透露曾經食太多菜及食齋一年，經醫生講解下了解到肉同菜都唔可以食太多，以及齋要食五色、地上、地下同水入面嘅植物都要食。甄采浠亦表示拍攝《本尊就位》時要兼顧《愛‧回家之開心速遞》同《你好，我的大夫》拍攝，每日休息時間極少；又因角色性格大不同，搞到有啲「精神分裂」，但就好開心可以同韋家雄合作，表示與對方拍對手戲笑唔停，又大讚韋家雄專業，無論咩場口都好快入戲。

另外，仲有唔少演員都喺兩劇出現過，例如吳瑞庭、陳嘉慧、謝東閔、莫偉文、鄭啟泰、李善恒、尹詩沛、區明妙、朱滙林、林穎彤、彭翔翎、丁樂鍶、黎寬怡、杜大偉、李芷晴、鄧永健、黃建東、蔡國威、曾健明、蔡國慶、秦啟維、謝可逸、羅雪妍、吳香倫及李紹堅等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！