李佳芯TVB頒獎禮唔見人唔出post 傳「被缺席」兼去意已決？

TVB《萬千星輝頒獎典禮2023》曲終人散，當晚全台藝人現身澳門出席盛事，但有約在身嘅2018年視后李佳芯Ali，即使有2項提名在身，居然不見芳蹤。

Ali話晒都係女一人馬，而且憑劇集《有種好男人》打入最佳女主角十強，另外仲入圍最佳女主持十強，照計一定有份去澳門出席盛事。去年底TVB台慶show《萬千星輝賀台慶》，即使李佳芯盛裝示人，但都係被冷待。有傳Ali因為社會立場被內地封殺，過去2年TVB內地微博都將Ali喺台慶現身嘅鏡頭，以打格仔遮晒靚樣。由於《萬千星輝頒獎典禮》會喺內地播出，未知係咪有關方面安排Ali唔駛到場。

有傳媒就發現，Ali對台慶頒獎禮同樣採取相應立場，就係不聞不問唔出post，並以同樣冇到嘅胡定欣喺社交平台為陳豪留言打氣作對比。報導仲話Ali因為「被缺席」而打算約滿走人。

貴為視后，李佳芯近年被安排做綜藝主持居多，主演劇集大幅減少，2020年至今只係拍過2套劇《智能愛人》同《有種好男人》，前者更加係TVB串流平台播完先出街，相比上位期一年三套劇簡直天淵之別。

去年底，掌管藝人事務嘅TVB高層樂易玲回應李佳芯被遮樣事件時表示，「我諗好多嘢佢（Ali）都會明白，佢知我哋好錫佢」。樂小姐又大讚Ali係個好好嘅藝人，「真係好好，我會盡量想辦法，繼續同佢有多啲合作機會」，而重點係樂小姐話Ali仲有好耐合約喺TVB度。而李佳芯之後都有感謝樂小姐撐佢，但就話「一直有同公司傾合約，但係仲未傾到適合條件，會再睇睇」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！