李家超施政報告讀錯字 「贍養」變「瞻仰」？Ben Sir：同情兼遺憾｜睇片

【Yahoo 新聞報道】特首李家超今日（25 日）就發表咗佢任內嘅第二份《施政報告》喇。今次報告內容真係幾長，李家超宣讀晒成份報告都用咗 3 個鐘頭 20 分鐘，破晒佢前幾位特首嘅紀錄，真係辛苦晒。小編都有聽晒成個直播，留意到特首有時都會讀錯字，佢都好快會糾正返；但今日有個讀錯字嘅位，真係聽到人個心都離一離呀。

大概 1 點半鐘嗰陣，特首喺講到「婦女發展」嘅段落，就提到關愛基金會推出「贍養費調解試行計劃」，協助與事雙方，包括遭拖欠贍養費的婦女以調解方式解決爭議。不過，特首就連續兩次將「贍養」個「贍」（音善）字，讀咗「瞻」（音尖）。大家聽到梗係醒一醒啦，因為聽落就好似係「瞻仰遺容」個「瞻仰」咁呀，真係大吉利是！可惜特首好似無發現讀錯，就落咗下一段喇。

講開又講，以往其實都有特首同埋其他官員畀人捉到讀錯字㗎：例如前特首曾蔭權就曾經將「造詣（音醋械）」讀咗做「做紙」，「冗長（音湧祥）」讀咗做「康祥」，至於前食物及衞生局長陳肇始，就曾經將「瑕疵（音霞癡）」讀錯成「霞癖」。雖然大家聽到都係得啖笑嘅啫，不過如果咁多位官員發言嘅時候都可以搞清楚發音，咁就最好啦。

一直推廣粵語嘅 Ben Sir 歐陽偉豪就同我哋講，對於特首將「贍養」讀成「瞻仰」表示同情同埋遺憾，「基於疲倦可能係會讀錯字」，所以中文教育相當重要，「尤其是廣東話口語訓練，教授正確發音係刻不容緩」。佢仲建議，中學文憑試嘅中文科考試應該重新加入口試咁話。