李玟家姐勇戰好聲音 唔怕貨比貨

無綫音樂選秀節目《中年好聲音》經過一輪初選後殺出100強，當中31位參賽者昨日聯同主持車婉婉及4位評審張佳添、伍仲衡、周國豐等拜神，總經理曾志偉主持切燒豬儀式。參賽者既有天后李玟家姐李思林、陳欣健女兒陳早怡、參加過ViuTV《肥美人》的李泇霖、《愛．回家之開心速遞》的「賈名媛」邱芷微、鄺文珣丈夫應德榮、「黑妹」李麗霞女兒蔡穎秋，以及「屯門娜娜」董幸兒等，話題十足。

李思林被問到賽前可有知會妹妹李玟？她說：「佢呢排比較忙，相信佢知道之後會好開心。（妹妹係天后令你有壓力？）壓力一定有，因為大家一定會拎嚟比較，但我同妹妹嘅聲線截然不同，希望大家畀個機會我，我會接受大家嘅意見。（叫妹妹到場支持？）我會叫家姐，其實我今次參賽就係想證明畀佢睇唔使驚，唔使怕比較。」

主持車婉婉畀貼士

陳早怡透露最後一刻才通知爸爸陳欣健：「我唱歌唔係好叻，但好鍾意，本來係陪兩個朋友面試，冇諗過入圍。（爸爸有冇畀意見？）問佢就會講，佢不嬲都好尊重我哋。」車婉婉30年前在《新秀》奪冠，笑言時間飛逝：「我用一日半睇咗超過200條海選片段，搞到眼乾又眼紅。（有咩貼士畀佢哋？）揀歌好重要，要清楚自己嘅音域同享受舞台。」