李龍基與細36年未婚妻婚事遲遲未成事被封「提款基」 為Chris公開澄清

73歲李龍基與細36年女友王青霞（Chris Wong）呢段「爺孫戀」已到訂婚階段，曾有傳李龍基將手頭上7個物業樓契過戶全歸Chris名下，加上二人早預告會喺去年底結婚，但遲遲未有成事，惹起外界注意。 早前，Chris搭小巴時遭一名疑似李龍基擁護者襲擊，即使身穿厚衫仍跌到臉部、膊頭、腰、腳等部位都係瘀痕；據Chris描述，施襲者當時表示：「賤人，嘔返七層樓出嚟，唔好再呃李龍基。」，所以絕對唔係點錯相。李龍基覺得事態嚴重，決定唔畀Chris再單獨外出，近日接受媒體訪問公開澄清外界對Chris嘅種種揣測。

李龍基受訪時澄清自己並未將物業業權轉讓未婚妻Chris，指Chris家族於佛山有間大工廠，而Chris自己都有一層1,800多呎及一層1,500多呎嘅物業，又指Chris父親曾經反對二人戀情，甚至開出送股份及送Tesla嘅條件叫佢離開女兒。李龍基逐提到，Chris早於10歲就被家人送往美國讀書，強調佢家境不俗；Chris亦補充指自己從小學琴、畫畫、寫書法，又曾學揸飛機，單單學費已過40萬美金。

同時李龍基對於Chris被屈用電腦作畫及其子女向媒體控訴被呃錢兩點大感心痛，亦表示點解有咁多低質嘅人。李龍基首先澄清Chris啲畫全部都係自己畫，坦言係唔係畫嘅一睇就會知。其次就係自己嘅仔女幾乎從未於媒體曝光，並無接受訪問，又指Chris與自己嘅子孫相處融洽，不時互傳訊息及食飯。另外，對於仲未結婚一事，李龍基解釋指係因為早前Chris家中有白事，須按照傳統及家人意願100日內唔可以辦喜事，所以將婚事延期，Chris補充指從未諗過悔婚，亦指自己唔會無端端咒屋企人。至於最新婚期，二人就仲未定好，但就表示會去美國籌備，亦唔會鋪張大搞。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！