東京奧運｜吳諾弘從童星變「劍擊新星」 負傷上陣實力驚人 為落敗發文致歉

香港男子劍擊隊喺東京奧運團體賽中第七名止步，不過出色表現令市民大讚，尤其係僅21歲嘅吳諾弘，首次踏入奧運劍道並喺拉傷大腿情況下為團體喺3局取下14分，被指係「劍擊新星」， IG人數由數百升至5.2萬，人氣急升。

雖然吳諾弘曾擔任過童星，演出《酒店風雲》、《最美麗的第七天》等多套TVB劇集，但童年時已對劍擊產生濃厚興趣，由小學三年班開始學劍，三度蟬聯全港小學學界個人花劍冠軍，完成拔萃男書院中五後決定休學，成為全職運動員，曾喺多次比賽中獲得獎項，如香港劍擊公開賽男花個人賽奪得銀牌、亞洲青少年劍擊錦標賽男花個人和團體賽銅牌；亦曾為TVB劇集《是咁的，法官閣下》黃智賢與關禮傑一場格劍戲份擔任劍擊指導；而吳諾弘參加到今屆奧運嘅契機正正係因為3月喺多哈格蘭披治賽中擊敗法國勒比祖（Erwann Le Pechoux）打入32強；教練Gregory Koenig見到佢強悍嘅實力。

吳諾弘噚日就喺IG發文報平安，指自己已經照咗磁力共振（MRI），只係大髀內側肌肉拉傷，好快會無事。佢又分享今次參與奧運感受，表示一直夢想成為香港代表隊，終極目標亦係參加奧運，甚至係可以行上頒獎台，所以呢次比賽對佢嚟講意義好大，呢段難忘旅程亦再一次提醒咗自己：「我係有幾鐘意劍擊」。吳諾弘亦指，今次表現同成績可能令大家失望，為落敗而致歉同時感激所有支持佢哋嘅人，承諾日後會更努力：「我一定會更加努力去訓練，打好往後每一場比賽，成為一個更好，更出色嘅運動員，甚至係一個更加好嘅人！」一班網民都留言鼓勵，指吳諾弘前途無可限量：「唔駛講對唔住吖，你做得好好，為我地爭光」、「第一次代表香港出賽打奧運打到有咁高水準已經好勁架啦」、「機會係留俾有準備既人，你一定可以的」等等。而教練Gregory Koenig接受媒體訪問亦表示吳諾弘無論係潛質定心理質素都好好，之前叫佢好好享受，展示能力呢啲事情都做得非常好：「完全是我想要的那種表現。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！