東張西望︳何伯何太直播披露仔女私隱 爆大仔兩頭住家兼拎何伯7位數唔還

何伯同新何太嘅話題一浪接一浪，日前佢地再次現身《東張西望》之外，亦一如之前公布嘅時間開直播。上次何太無預警開直播上演同老公錫錫、爆何伯「一晚5次」之後，今次二人更加大爆何伯同亡妻所生5個仔女嘅私隱！

何伯同新何太尋日下午開直播，何太叫老公「講吓你啲仔女」，何伯就二話不說先講大仔喺2016年8月「攞咗我60萬，支票40萬，現金20萬」，又話對方「2016年3月24號又取咗30萬買車，合共取咗我一百三十幾萬」。何伯透露大仔「咬糧」後會畀返100萬佢，但到「咬糧」時何伯打俾大仔叫對方俾返50萬，但大仔唔聽佢電話。何伯直斥大仔反骨忤逆，拎佢嘅錢買車買樓，仲爆埋大仔喺警隊嘅職位，而且有「兩頭家，一頭家喺內地仲生咗對龍鳳胎」。

而曾經同何伯同住嘅二仔，被何伯聲稱2018年向老豆要5萬蚊買保險，何伯公平起見向5個仔女一人畀5萬。何伯又指二仔去年拎咗佢35萬裝修公屋，前後借咗六十幾萬，但一如《東張》提到，何伯二仔早前換門鎖，令佢冇得返去拎返個人物品。何伯又鬧二家嫂同個孫對住佢黑口黑面。至於另外2個女，何伯話大女同細女「攬炒」，又指細女保留何伯亡妻共重十兩嘅金飾。何伯繼續鬧仔女不孝，話試過去佢地屋企上門撳鐘都唔開門，仲叫保安趕佢走。何伯直播中宣布同仔女「斬纜」，更驚人係話「我同佢地個個都買晒陰宅，你睇佢地點對我？」。

至於被細女提取嘅450萬，何伯聲言力追到底，打算去銀行總行示威，甚至要求見銀行董事長同行長，又話要搵警務處長同特首討回公道。有自稱何伯仔女聲稱筆錢由已故何太儲落，仲有部份係仔女俾嘅家用，何伯回應話嗰450萬係佢開裝修公司賺到，又強調仔女冇養過佢。

何伯話亡妻早年因病入院，有3年時間由佢照顧，直到2016年太太病逝，何伯形容獨身時自己「孤孤單單」、「冇餐正經飯食」。新何太就幫忙補充「即係照顧咗3年，單身9年，加埋12年冇掂過女人嘛」。何伯又投訴早前感染新冠病毒昏迷三日三夜，都係多得新何太照顧，甚至連累對方都中招，但仔女完全冇人照顧佢。

何伯發言時拎住「貓紙」，似乎有備而來，不過直播途中鏡頭後有把男聲提醒何伯「貓紙」遮住鏡頭，暫時未知該名男子身份。呢次直播最高峰時有萬幾人收睇，而《東張西望》就播出預告指何伯同新何太周四晚會再出現，睇怕仲有大把花生食。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！