林作連環不幸事件 抽兇案水被炒 視網膜脫落 賣樓劈價過百萬

警方今日（18 日）拘捕林作，據了解是跟加密貨幣交易所 JPEX 風波有關，警方到林作位於中環娛樂行的辦公室搜查，檢獲現金，並將他帶返警署。

林作近年以抽水王自居，2020年投身保險界後日益高調，但係今年林作都遇到唔少麻煩事，由6月以荷里活廣場命案抽水事件後就接連出事。

荷里活廣場6月初發生全城轟動嘅命案，一名男子喺商場內用刀襲擊2名女子，2名傷者終傷重不治。以「香港抽水王」自居嘅林作，命案發生後喺社交平台post出一張模仿疑犯造型照片，仲話「放售疑犯同款波鞋」、「逃跑一流」，被唔少網民鬧爆，之後林作就刪post了事。林作任職嘅保險公司之後發聲明，表示「知悉有個別理財顧問於社交平台就近日的社會悲劇作出不當言論及行為，這與我們公司的價值觀背道而馳」，並決定「與有關理財顧問終止合約」。而林作亦向傳媒證實，保險公司高層同佢提出解約。

曾經發聲明表示「堅決不為我的言論道歉，並自豪重申：作爺從來不道歉，才能走到今日」嘅林作，喺被炒後舉行嘅記者會「鬆口」表示可以向死者家屬道歉。而記者會後林作同媽媽Lily（王莉妮）接受傳媒訪問時，正式就抽水事件鞠躬道歉。

抽水被炒嘅林作，之後轉型教人投資同推廣加密貨幣，7月時喺社交平台宣稱「申請成為JPEX合伙人」，之後又喺講座推介JPEX。林作上個月出過post表示由教授股票班獲得一筆近75萬元嘅收入，直言「好搵過以前做保險N倍」，更曾經指明年係加密幣牛市﹐高調表示要賣樓套現轉攻幣界，但就被地產界人士踢爆佢手持嘅紅磡海逸豪園3房單位，放盤未夠一個月叫價就由1000萬劈落868萬。林作更於中環開設加密貨幣兌換店，上星期先至正式開張，但無耐JPEX被證監會點名。

另外喺7月初有廣告公司發文，表示佢哋早前同男團MIRROR合作嘅日本護膚品廣告，被另一間無份參與嘅市場推廣公司挪用盧瀚霆(Anson Lo)、姜濤、陳卓賢(Ian)及呂爵安(Edan)出席護膚品宣傳活動嘅照片，並聲稱廣告片及活動由佢地負責。廣告公司透過律師向市場推廣公司發信要求解釋，最後網民揭出涉及事件嘅市場推廣公司負責人之一係新城DJ凌志灝。而有網民聲稱林作曾經同凌志灝嘅市場推廣公司見面﹐因而被捲入事件，林作後來陪同凌志灝出席記者會表示與事件無關。

而林作喺7月中時發現右眼不適，後來更視力模糊兼頭暈，睇醫生後證實係視網膜脫落，於是立即入院做手術。幸好後來無事康復，而且女友裕美悉心照顧，令向來唔多滿意裕美嘅作媽都大受感動，二人關係破冰……咁都衰唔晒嘅。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！