林家謙新歌奪冠現身《CHILL CLUB》 澄清得獎感言:係我好彩
ViuTV年度音樂盛事《CHILL CLUB 推介榜年度推介23/24》喺兩星期前(12日)圓滿結束,期間Tyson Yoshi代缺席嘅林家謙領取「CHILL CLUB年度唱作歌手獎」時,講出一句「唔係我勁,係你哋廢!」,引得全場爆笑兼掀起熱話。去到噚晚(26日)播出嘅ViuTV音樂節目《CHILL CLUB》,林家謙嘅《喃嘸師感官漫遊》獲得「CHILL CLUB推介榜」冠軍,佢喺趁為節目錄影親自回應Tyson嘅呢番說話。
噚晚播出嘅《CHILL CLUB》,林家謙以一身「喃嘸師」造型亮相,喺演繹冠軍歌《喃嘸師感官漫遊》前,佢除咗多謝CHILL CLUB給予冠軍之外,佢仲回應Tyson Yoshi代領獎項時所講嘅「唔係我勁,係你哋廢!」。首先佢先以「陳家謙」作自我介紹,自抽喺「第35屆金曲獎」入圍記者會被台語歌后曹雅雯讀錯名一事,之後再回應Tyson:「大家好,我係陳家謙。今日好開心喺度攞咗呢一個真嘅「Chill Club年度唱作歌手獎」,當日領獎嗰個並唔係我嚟㗎,個獎都唔係我㗎,咁所以呢個係真嘅。我想發表感言,就唔係我勁,都唔係其他人廢,係我好彩,所以多謝每一位投票嘅樂迷。」
原來今次係林家謙相隔三年再度亮相《CHILL CLUB》,而佢亦有喺IG上載節目片段,並話:「事隔近3年冇上chill club, 估唔到要喃嘸師送九展錄影廠最後一程, 對於哩個地方.. 謝謝幾年既回憶、喃嘸live第一次 & 嗰個第一次,新廠見」
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!