林慧倩拍攝電影《潛行》與兩大男神零距離接觸 彭于晏爆肚提神 劉德華親自教戲

鍾情搏擊運動的林慧倩（Giselle）打足九年，除了平日操體能、練拳，早前更擔任主辦單位出錢出力做小型MMA比賽，上周日（14日）於新蒲崗進行第二個MMA賽事，邀得鄺旨呈及51歲凍齡健美媽媽賴朗嘉等到場支持。格鬥場內熱血沸騰，Giselle亦看得相當肉緊：「其實我都好想落場打㗎！但係我哋啱啱先搞第二次，作為主辦真係好多嘢要做，完全分唔到身訓練，不過我哋定咗一年搞四場，希望年底前我都可以落場挑戰吓自己。」

Giselle對搏擊運動的熱愛，由修身開始：「九年前開始接觸泰拳同MMA，嗰時主要係當做運動，因為做完運動真係令人好開心，搏擊運動量好大，可以發洩又可以修身，女仔識打仲可以保護自己，所以開始咗玩就停唔到。」她又指尤其MMA自由度高，比賽時的技術更是變化多端：「永遠冇話一招就定輸贏，好好玩，不過講到真正開始着迷，係五年前演過一套以MMA做主題嘅電影《擊鬥女神》。嗰次係將我兩樣好鍾意嘅嘢拉埋一齊，又得打又可以演戲，真係好開心。」

提到演戲，密密拍電影、劇集的Giselle，亦有份為最近上映的ViuTV劇集《法與情》及電影《潛行》演出。Giselle坦言入行12年於演藝路上仍有不少進步空間：「我真係好鍾意演戲，平時做司儀都係着靚靚、大方得體，但係演戲就可以有好多唔同造型，又有好多唔同嘅人生。我好鍾意喺片場嘅感覺，所以咩角色，大大細細我都做。」

Giselle於《潛行》中隸屬彭于晏的組員，與對方經常有對手戲：「我條故事線主要係Backup彭于晏做嘢，所以今次真係有好多場合作。好多朋友知道我同佢開工，係咁問佢靚唔靚仔，佢靚仔身型又弗就梗㗎啦。但係我覺得最正係佢好鬼馬，個人又好友善，鏡頭後真係笑到停唔到。」她憶述戲中的大型槍戰場口，雖然天氣炎熱而且拍攝時間很長，彭于晏為讓她們回復精神，在不用收音的場口瘋狂爆肚：「我哋個樣要好正經，唔笑得㗎嘛，嗰下忍得好辛苦，不過好彩有佢搞吓氣氛，啲energy都返晒嚟。」

除了彭于晏，Giselle更獲劉德華於片場教路：「因為我同劉生冇咩對手戲，但係佢係監製又係演員，所以成日都見到佢。有場戲佢仲親自指點咗我幾吓。嗰次佢教我同戲中『組員』畀個側望嘅反應，我隔住導演個mon都感覺到佢個氣場，真係好似識發光咁。其實我喺內心大叫咗聲，因為真係好有戲、好有型，所以我都有靜靜睇吓劉生嘅表演，偷吓師。」

她指從兩人身上學到更多是當藝人的態度，工作的時候很從容，但對自己的要求很高：「彭于晏係無論拍到幾夜，第二朝都堅持去健身，劉生做嘢好認真好有要求，每個鏡頭都要盡力做到完美。今次拍《潛行》真係學到好多嘢，我會記得要好好警惕自己，幾時都要保持最佳狀態。」

她表示當日有份參與《潛行》的選角已相當興奮，能夠接拍更是機會難得：「咁大型嘅製作，仲要係動作電影，啱晒我！今次嘅動作場面，係我參與過最大型嘅，仲有得玩槍。開鏡前，我特登搵咗個朋友借咗枝槍，喺屋企對鏡狂練，有一場，我要喺幾秒開三十幾槍，超正，好刺激！」拍動作片難免受傷，Giselle笑言意料之內：「拍得都預咗，少少擦傷撞瘀實有㗎啦。我好感恩有份拍《潛行》，記得電影去到中後期，監製王雅琳話睇到我愈拍愈進步，嗰刻真係感動到眼濕濕，。我拍戲經驗唔多，自知仲有好多要改善同進步嘅地方，所以有人睇到我嘅進步，真係好大嘅鼓勵，我會繼續努力，做一個有人會記得嘅演員！」