林敏驄擸獎想揼志偉 與陳瀅尷尬撞裙 郭柏妍恨洗「魔」名

藝人林敏驄前晚在頒獎禮上不改口沒遮攔本色，明寸外號「153」的曾志偉，指對方身為無綫高層不得民心，揚言：「揼到佢變143！」同場的陳瀅與郭柏妍穿上款式超似的低胸裙，認真巧合！

有網上平台前晚舉行頒獎禮，林敏驄憑無綫劇《下流上車族》獲頒「人氣電視男角色」獎，他發揮幽默本色，見現場有女士直豎拇指畀Like即反問：「阿婆你做乜擺隻『指公』出嚟？」又明寸無綫高層曾志偉：「見193喺度，153（曾志偉）有冇嚟？有嚟幫我揼到佢變143！佢冇嚟啦！不得民心，佢做呢啲位有乜用？」全場起哄狂笑，他續說：「講真話反應幾好！再嘈揼到佢變133！」當劇中女兒郭柏妍領取「人氣急升」獎，他又寸爆對方是「魔音」：「講嘢一舊舊，衰過葉念琛！」郭柏妍戲稱要他幫忙洗脫「魔音」稱號，他說：「返屋企洗。」

至於陳瀅與郭柏妍穿上顏色與款式相近的低胸裙，認真尷尬！對於與劉佩玥、陳曉華憑劇集《美麗戰場》獲頒「人氣電視劇CP」獎，陳瀅笑說要屈導演葉念琛請去旅行慶祝，問是否注資拍第二季，她說：「我冇話注資幾多錢，一蚊都可以，做個小股東。」

12鏡仔掃13獎

男團MIRROR以組合名義連掃3獎包括「十大人氣歌曲」，成員姜濤獨得4獎包括「人氣票王」，但因養傷未有現身，隊友Anson Lo、Jer、Ian與Edan亦各獲獎項，12子合共掃走13個獎！Ian對於傳捧「叱咤樂壇男歌手」銅獎，他說：「只係預測，多謝大家覺得我有能力拎呢個獎，攞獎就平常心。」而Anson Kong坦言未知姜濤能否出席叱咤頒獎禮：「要睇情況，如果佢嚟唔到，可以同佢視像。」

獲頒「本地音樂組合」獎的ERROR，被同場的張艾嘉指有主動打招呼，問有否看過對方的電影，193竟說還是「精子」時已看，阿Dee則表示看過《女人四十》，希望對方開部《男人八十》給他們，但其實他擺烏龍，《女》片主角實為蕭芳芳。至於勇奪「本地女歌手」等3獎的鄭欣宜，笑指「老公」Anson Lo不用買飛看她的演唱會：「入後台就得，因為佢係家屬！」