林日曦參加世界反枱大賽飲恨「梗頸四」 網民鼓勵下年再接再厲

有「腦細」之稱毛記創辦人林日曦近年移居日本，喺噚日（26日）佢喺社交網站上載多張自己驚現日本NHK電視台嘅影片截圖，並透露自己喺當地參加咗「世界反枱大賽」，而佢嘅成績就係22位參賽者中排行第四，對於呢個「梗頸四」賽果，佢雖然表示遺憾，不過下年一定再參加比賽。

林日曦喺社交網站留言話：「er…我唔小心上咗日本電視台…（NHK）話說前排我參加咗日本「世界反枱大賽」，我想參加呢個比賽好多年了，今年終於有機會，申請嗰時我sent咗我之前喺舞台劇《大MK日》反咗39次枱嘅片段俾大會，同佢哋講我係「反枱愛好者」最後成功拎到「非本地人」外卡參賽。」

呢個比賽玩法非常簡單，參賽者扮演昭和時代嘅頑固阿叔，喺女演員講完對白後，然後扮嬲咁講出一句自訂嘅憤怒說話，之後就大力反枱，睇下枱上條膠魚飛得有幾遠，最遠嗰位就可以勝出比賽，不過參賽者需要留意枱不可以超出榻榻米，如果唔係就會取消資格。林日曦當日排尾二出賽，佢大叫完「日本語がとても難しいですね！」（日文真係好難呀！），之後就大力反枱，結果成功將魚飛咗出去4米15外，成績係22位參賽者中排行第四。佢表示：「雖然入唔到三甲，但佢哋知道我係香港嚟，所以送咗一件Tee作為安慰獎俾我，哽（梗）頸四，殘念ですね，來年一定再戰（至於條片，喺某知名y字頭影片網站我個channel）」

呢個PO一出，唔少網民對到佢作為「香港反枱代表」感到自豪，並留言鼓勵佢下次再接再厲，例如「腦細下年再嚟過」、「有乜理由會係第四！腦細唔該你參加到要攞到第一為止」、「腦細 下年加油！」、「加油， 2024年再接再厲呀～ 第一次已經第四名，絕對係佳績」、「睇好你！下年再努力啲」及「下次再接再厲！一定會贏返㗎」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！