染Omicron康復中 商台DJ麻利即日離職 超長文回應︰人生總有啲位置好想郁

商台多名DJ確診感染新冠病毒，2月中開始因病冇返工嘅903DJ麻利，被網民發現名字喺商台官網消失，同鄭裕玲及迪偉主持嘅《口水多過浪花》已由傑朱代替，周末個人節目Mali Mali Home時段換上另一主持Woody嘅《叱咤樂壇Brand Yourself》。有傳麻利同電台因為接種疫苗意見分歧而離職，而商台回應傳媒時表示「本台與叱咤903主持人麻利已達成共識，她於2022年3月7日起會暫別商業電台及節目《口水多過浪花》。」

麻利深夜喺個人社交平台發長文回應離職事件，冇提到係咪因為打針問題而走人，但係透露「人生總有啲位置好想郁」，早前確診休養時「湧起咗一份堅定」，又話「不過人同人之間，有緣份就會一齊行、過咗就會分開行，唔係定律咩？」。

39歲嘅麻利入職商台多年，本來於公關部工作，後來獲賞識開咪，2009年起轉職做DJ，曾經同少爺占、Donald、梁文禮等主持合作。2016年間麻利被一位狂迷跟蹤滋擾，同年6月麻利4位男同事被該名狂迷襲擊，其中Donald更被打至骨裂，事後涉案的士司機被捕。前年麻利曾經批評新一代歌手咬字有問題，有指姜濤歌迷對號入座認為偶像遭挑剔。

麻利上月確診感染新冠病毒，並分享患病感受，形容「喉嚨俾𠝹刀𠝹傷咗咁痛」。到近來已經痊癒，但就傳出離開商台嘅消息。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！