柳應廷《一首歌的時間》再度推出 岑寧兒成首位登場嘉賓

柳應廷Jer 在初出道之時，曾邀請不同歌手參與《一首歌的時間》，以Live Band形式，透過不同編曲一Take過合唱〈水刑物語〉，得到極大迴響。事隔4年，《一首歌的時間》再度登場，首個被邀請的嘉賓為Yoyo岑寧兒，二人更將Jer的新歌〈約齊靈魂在墳墓開生日派對〉來個大變身，以爵士樂方式呈現。

今次Jer與Yoyo除了一Take過合唱〈約齊靈魂在墳墓開生日派對〉外，還唱出了Jer的〈大海少年〉。邀請Yoyo參與其中，全因Jer十分仰慕對方，Jer向Yoyo自爆道：「對上一次係演唱出道歌，今次再做呢個Project，就好想搵圈裡面一直都好仰慕嘅朋友，Yoyo就係其中一位，佢嘅歌長期都喺我歌單裡面出現。我問Yoyo出歌未，佢話未呀，其實我心裡面好想佢快啲出歌。今次特登搵佢合作係好開心，因為一直以嚟都好欣賞佢啲歌，我自己喺台上唱過好多次，今次終於搵到你一齊唱我嘅歌，而你又好鍾意我嘅〈大海少年〉，我都好Surprise，所以好多謝你。」Yoyo指自己都聽過Jer翻唱自己的作品，並笑言：「Jer有講話可以唱新歌㗎，但我冇新歌，未寫完呀，所以不如唱你嗰啲啦！」Jer坦言不只自己，就連身邊朋友都好希望二人能合作，過去他幻想過跟Yoyo合唱，即使是唱和音也很開心，現在可以一同合唱，可算夢境成真。

與前輩合作，Jer指自己反而要Yoyo好好學習！Yoyo解釋道：「因為唔同嘅合作嘉賓，Jer都會將〈約齊靈魂在墳幕開生日派對〉重新編曲，Fit返各人嘅風格與感覺，所以準備今次嘅現場錄影，都溝通咗好多。」Jer也說：「我迫Yoyo學習我首新歌，因為俾佢聽時係未出街。Yoyo仲俾咗好多意見點樣去改編，令到首歌可以有趣啲，所以呢個Version係好正。」

二人合作的版本以爵士樂呈現，Jer指Yoyo有積極參與，他說：「Yoyo用電話錄音哼出整個Flow，係好正，如果有機會遲啲分享俾大家聽下。」Yoyo聽到Jer這樣說，也不好意思道：「我自己的歌偏靜，怕大家以為要好靜態好Peaceful咁去完成一首好瘋狂嘅歌曲，其實都可以喺我熟悉嘅Genre（類型）裡面搵到一啲有Party氣氛嘅嘢，與其佢哋喺度估唱呢隻歌會係點，我不如分享我嘅感覺，但我唔識講，所以唱俾佢聽。」

經過這次合作，Jer跟Yoyo都很希望可以日後有機會同台演出，Jer更說：「其實我哋都想唱一首Yoyo嘅歌，或者留返下次上台先玩俾大家聽啦！」Yoyo都附和道：「我覺得有呢個機會嘅！」