核對身份 入場打蛇餅 MIRROR「空降」紅館 騷前爆墮台意外

MIRROR
MIRROR

風靡全城的MIRROR演唱會終於揭幕,12名鏡仔型爆從高空吊住登上紅館舞台,以勁爆舞曲秒速炒熱現場氣氛,鏡粉的尖叫聲不停。開騷前卻驚爆發生意外,有人跌落台送院!

男團MIRROR首個紅館演唱會昨晚在連串非議聲中開鑼,吸引大批圈中人捧場,包括汪明荃、鄭裕玲、MakerVille高層魯庭暉、組合ERROR、張繼聰與謝安琪及子女、男子組合P1X3L、師妹女團COLLAR等。演唱會於晚上8時45分開場,MIRROR化身白馬王子現身,全場哄動,被吊在半空的12子緩緩降落舞台,寓意成功空降紅館,12子在煙花及震撼紅館的尖叫聲下,勁歌熱舞連唱3首團歌《Innerspace》、《Reflection》及由Tiger、Jeremy負責Rap的《All In One》。

MIRROR氣勢銳不可當,鏡粉昨日中午開始攻陷紅館場外,在鄰近車站、場館外打蛇餅應援,場面壯觀。其實昨晚入場的歌迷分別持有實名制及非實名制的門票,其中因實名制門票的持票者需要先到帳篷核對身份,符合者綁上手帶並要在手上蓋印識別,因過程需時,所以約下午4時已有持實名制門票人士排隊輪候。見現場設約20個攤位進行查票及辦手續,約7時許,每個攤位已有逾百人排隊。

持實名制門票入場的鄺先生受訪時表示:「實名制買飛都幾方便,(可以遏止炒黃牛?)都可以,知黃牛黨炒得好勁,令歌迷買唔到,我係實價買飛,怕多人都提早咗一個鐘嚟,排咗半個鐘辦手續。」至8時許,大批歌迷開始排隊入場,但過程頗混亂,出現多條人龍,有歌迷投訴入場指示不清晰,每位入場人士有一件雨衣及風扇仔作為贈品。

其實今次鏡仔開騷鬧出很多是非,繼有鏡粉插爆門票開售系統失誤,又狠批實名制安排混亂,再有姜濤國際歌迷會涉嫌炒飛等負面新聞,開騷前夕一班參與演出的舞蹈員更群起爆大鑊,在網上晒出全黑圖爆粗寫道:「用我哋條命去滿足你哋嘅自私自利。一次事故睇清人性醜惡」、「畀番少少專業,帶個腦返工,話晒都食鹽多過人哋食米,唔好吓吓都話執生,執你老X」、「自跳舞以來,感受最差一天。」等。

AK發黑圖 姜濤「平安論」秒刪

據悉,前晚總綵排時發生意外,有3名舞蹈員先後跌落升降台要送院,由於連日來綵排時間急趕,眾人已身心疲累,加上舞台一些機關操作錯誤,較早前已有舞蹈員曾出事受傷,意外頻生,卻竟有人說:「要小心啲,執生!」即激怒一班舞蹈員,覺得主辦方罔顧他們人身安全,所以出甫公開譴責。而舞蹈員出身的成員Anson Kong及Frankie都發出黑圖「幫口」譴責,AK指在他心中,舞蹈員也是主角,寫道「第一次係意外,第二次係大意,第三次係疏忽」。姜濤則曾出甫希望眾人可以平安,但很快刪除,而就舞蹈員跌傷一事,有關方面表示沒回應。

MIRROR 12子從天而降,紅館即被尖叫聲籠罩。
MIRROR 12子從天而降,紅館即被尖叫聲籠罩。
Anson Lo與Jer連場勁舞。
Anson Lo與Jer連場勁舞。
姜濤、Ian攬頭攬頸。
姜濤、Ian攬頭攬頸。