梁朝偉劉嘉玲初相識零感覺 拍拖20年因一事結婚 多年訪問曝光二人性格大逆轉？

香港電影金像獎頒獎禮上，獲得最佳男主角嘅梁朝偉身在外地未能出席，其太太劉嘉玲代為上台領獎。二人隔空互動嘅場面有趣之餘亦見默契， 梁朝偉感謝太太多年來嘅支持，而嘉玲姐插嘴問「阿梁朝偉，我可唔可以講兩句？」，梁朝偉就話「梗係得啦嘉玲姐」。而劉嘉玲再次提到梁朝偉係個好偉大嘅演員，梁朝偉就謙虛地表示自己只係個好演員，稱不上偉大。

唔講唔覺，原來梁朝偉同劉嘉玲一齊已經超過35年。近年網民成日形容梁朝偉有「社恐」，同長袖善舞嘅劉嘉玲形成強烈對比。但係有網民搵到多年前梁朝偉同劉嘉玲喺台灣綜藝節目一同受訪嘅片段，驚覺當年二人性格同而家相比簡直係180度逆轉，梁朝偉表現得比而家開朗，反而劉嘉玲不時顯得腼腆。訪問中，梁朝偉話自己比較大男人，希望太太會打理家頭細務，甚至話最怕女強人！有網民認為梁朝偉當年嘅答案，簡直係大大力自己打面。

梁朝偉同劉嘉玲80年代一齊喺TVB工作，佢地都係大台力捧小生花旦，因此一齊合作過《新紮師兄》、《鹿鼎記》等劇集，但到1988年二人因為參演《花心大丈夫》舞台劇而交往。早年接受黎芷珊《最佳女主角》訪問時劉嘉玲曾透露，初初認識梁朝偉時冇覺得對方吸引，因為雙方各有對象，而梁當年同劉嘉玲好友曾華倩拍拖，嘉玲姐因此得知梁好忙冇時間陪女友。當年有傳梁朝偉、曾華倩同劉嘉玲一度陷入三角戀，訪問中劉嘉玲避重就輕地表示佢地三個人知道係點就好，並且爆梁朝偉同曾華倩三度離合，中間梁又同另一當年TVB小花黎美嫻拍過拖，而梁甚至有其他女友。雖然關係一度曖昧，但梁朝偉榮登台灣金馬影帝後，劉嘉玲為男友搞慶祝party時毫不避嫌請曾華倩出席。

梁朝偉同劉嘉玲拍拖20年，中間經歷過劉嘉玲被綁架、裸照事件、雙方各自嘅緋聞等風波，到2008年佢地喺不丹舉行世紀婚禮。劉嘉玲透露，拍拖多年梁朝偉不時提議結婚，但劉嘉玲一直認為未係時候而拒絕。到2007年，劉嘉玲父親逝世，嘉玲姐認為爸爸未能睇到自己出嫁係遺憾，於是向梁朝偉提出結婚，希望為自己留下回憶。

劉嘉玲喺頒獎禮上形容丈夫係偉大嘅演員，呢個講法一早喺接受黎芷珊訪問時已經提到，而劉嘉玲亦表示佢盡力成就梁朝偉嘅演戲事業，將家事處理好，令佢無後顧之憂。2018年劉嘉玲更成為梁朝偉經理人，更促成梁朝偉拍攝Marvel電影《尚氣》。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！