梅啟明自稱有返工 冇靠梅艷芳遺產過活 月入2萬養2頭家

已故天后梅艷芳嘅大哥梅啟明，早前喺銅鑼灣一間食肆工作期間仆親入院，有報導話佢一度昏迷被送到醫院治理。繼尋日梅啟明向傳媒透露自己仲未出院，又話泰籍女友查小姐代佢去探梅媽（梅覃美金），梅生終於有機會透過視訊見到阿媽，不至於同「美金」「脫鈎」。

仍然住院嘅梅啟明再接受傳媒訪問，再次重申工作期間跌倒之後，真係有昏迷，到第二日下晝先醒，又強調自己冇中風，而家退咗燒應該好快出得院，我地真係恭喜你早日康復嘞。

網友聽見梅啟明因工受傷，第一個疑問都係「原來佢有做嘢」，即係大家以為梅生用緊梅姐遺產過日晨。梅啟明就話自己一直都有打散工，飲食、地盤都做過，仲反問「唔做嘢點生存？」。梅啟明對於被人稱為「遺產界KOL」等負面標籤當然好大反應，話「點靠阿梅啲錢維生？」，澄清自己冇拎過梅姐一分一毫，佢係俾人抹黑。

梅啟明長期炒散，而事發嘅餐廳佢做得最長，由去年8月做到出事嗰陣都有7個月。梅啟明指本來返工嘅餐廳長期缺人，佢要身兼多職，一時唔留神就跌親。一早過咗退休年齡嘅梅啟明，話自己冇退休金，亦唔會申請綜援。而家月入2萬左右，份糧會俾泰籍女友同喺大馬嘅13歲囝囝，真係唔容易，不過正所謂「條路自己揀」……點都要繼續行。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！