楊恭如被文雋指性格單純 大爆當年周正毅點樣追求佢

1995年香港亞洲小姐冠軍楊恭如，當年憑住亮麗外型而獲得「最美亞洲小姐」之稱。入行後隨即備受力捧，擔正做劇集女主角，之後又被睇中拍電影，例如《甜蜜蜜》、《風雲之雄霸天下》、《行運一條龍》、《古惑仔》系列等等都令人印象深刻。不過近年佢已經大幅減產，有一段時間未有喺香港出現，只係間唔中喺社交網站分享美妝保養及遊山玩水等資訊。

楊恭如當年不乏追求者，但感情路相當坎坷，當年上海前首富周正毅太太喺中環掌摑楊恭如一事更驚動娛樂圈。早前佢嘅前經理人文雋喺YouTube頻道「文雋 講呢啲 講嗰啲 Man's Talk」講解王家衛新劇《繁花》嘅黃河路，兼爆出當年周正毅點樣追求楊恭如。

文雋直指當年楊恭如與周正毅嘅緋聞對女方有好大嘅影響，而佢亦多次問恭如媽媽及恭如。文雋認為楊恭如係一個好單純嘅人，佢之前覺得雖然佢係有家室，但有人鍾意及追求佢：「嗱，呢個我聽返嚟，但係個男人曾經承諾過『我會離婚。』或者有不治之症，呢啲我哋寫戀愛小說都係咁，總之令我呢個傻妹，呢個楊恭如信到貼貼服服，佢阿媽就好焦急，不過我覺得所有不該都係呢位周生。」

其後，文雋憶述一次同到達上海嘅楊恭如講電話嘅情景：「老豆，呀邊個嚟接我呀。」當時文雋問：「佢點接你呀？」楊恭如就回答：「你睇吓，架跑車喺後面跟住我哋架保姆車」。喺片中，文雋表示：「所以有錢人追女仔或者追女明星，手段梗係容易啦，因為要乜有乜。」

之後，文雋再提及當年楊恭如喺中環被掌摑一事：「嗰時佢媽咪打電話俾我，頭先喺某一個商場嘅咖啡室發生咗一件事，就係掌摑事件。當時我即刻叫佢（楊恭如）上咗我屋企，呢啲就叫做公關呀嘛。就係要諗個真相係點樣。雖然我同恭如而家冇咗經理人同藝人之間嘅關係，但係我同佢每一年都一定會見面，去北京或者上海有空就會約佢食飯...上個月有一次通電話，佢話想做直播，上個月先做完但係真係唔得。我好疼錫楊恭如，但係佢真係呢件事耽誤咗佢。」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！