極度俏郎君丨黎彼得「通波仔」手術後無工開幸得黃宗澤幫忙 拒返TVB大讚ViuTV開工舒服

72歲TVB資深演員黎彼得於《愛·回家之開心速遞》飾演豹叔一角，與劉丹、羅樂林及陳榮峻組成「大四喜」，不過去年年底劇情交代豹叔到加拿大探親；黎彼得無出現於其他劇集。原來，黎彼得正正於去年底接受「通波仔」心臟血管手術，及後未被安排復工，以致手停口停，經濟拮据。日前（17日），黎彼得出席ViuTV新劇《極度俏郎君》開鏡拜神儀式透露自己現時可兩個電視台走，但就指ViuTV舒服得多。

《極度俏郎君》開鏡拜神儀式出席藝員包括姜皓文、宣萱、張慧儀、強尼、練美娟、葛綽瑤（Yoyo）、ERROR及黎彼得。黎彼得表示，去年底做完手術後，TVB未有安排佢復工，幸得契仔黃宗澤幫忙生活費，富商劉鑾雄得知佢情況後，更主動以支持者身分提出資助，令佢大為感動。黎彼得又向傳媒指，一直以為11月就約滿TVB，但原來仲有一年合約，不過藝員部指佢係兼職可以兩邊走；坦言出院到而家TVB都無搵過佢開工，珍姐（曾勵珍）就連電話都無個。

黎彼得亦透露早前因確診休息咗半年，而今次拍攝《極度俏郎君》時間僅每日一組，所以無咁辛苦較舒服；被問到如果TVB搵佢返去拍劇會唔會拍，佢就直言最好唔好，因為要捱更抵夜，自己年紀大頂唔緊，搵到都唔夠醫藥費。至於，《愛·回家之開心速遞》「大四喜」四缺一情況，黎彼得就表示無辦法，呢個世界無話無咗邊個唔得嘅。

喺噚晚（17日）播出嘅《愛·回家之開心速遞》，劇情講到「大四喜」三位成員前往古里梧島探訪孤兒，並攀登當地有名嘅雪山，不過途中其他「老友記」因種種原因不斷離隊，仲有巫師警告不宜登山及唔可以亂碰「鎮山石塔」，否則會觸怒山神。最終「大四喜」及佳叔（鍾志光飾）登上雪山，不過遇上火山爆發，佢哋及時爬上大石，更喺石上唱歌進行死亡直播，好彩熊樹仁（單立文飾）搵人救佢哋。喺成功脫險後，「大四喜」再獲得演出機會，佳叔出現並話好多網民期待佢加入「大四喜」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！