樂易玲進駐小紅書 內地網民留言「別找蔡思貝演戲」獲1.6萬讚好 本尊大方回應
蔡思貝入行後隨即備受TVB力捧,參與多套劇集拍攝,更憑《踩過界II》榮升視后。雖然公司俾晒機會,不過佢嘅觀眾緣始終都係麻麻哋。TVB高層樂易玲早前開設小紅書帳戶,不時上載和藝員嘅合照與網民分享,唔少內地網民都有留言表達意見,其中一則就係關於蔡思貝嘅負評,呢個留言吸引超過1.6萬個讚好,認真誇張!而蔡思貝喺接受訪問時,亦有大方回應。
蔡思貝喺2013年參選港姐獲亞軍後入行,加入無綫後即被力捧,喺2014年劇集《名門暗戰》及《八卦神探》擔任女配角,2015年更升呢做女主角,不過劇集角色係做衝動嘅新人角色,加上當時演技幼嫩、講對白多懶音、把聲又太尖太嘈,令好多觀眾唔鍾意睇佢嘅演出。之後,佢開始將把聲壓低去演繹角色,觀眾對佢嘅表現先有少少改觀。直至《踩過界》系列,蔡思貝飾演哨牙又粗魯嘅黑社會師爺趙正妹(癲姐),形象深入民心,獲得觀眾唔少好評,先後獲得「最受歡迎電視女角色」及「最佳女主角」,以29歲之齡成為第一位「90後」視后。唔少網民都睇得出佢喺演技、聲線同埋講對白嘅速度都落咗唔少苦功,對佢嘅演技改觀,不過佢嘅觀眾緣始終都係麻麻哋。
TVB高層樂易玲開設小紅書帳戶,第一個帖文明明係與胡鴻鈞及高海寧等人合照,但唔少網民就留言表達其他意見,當中最多人講嘅係蔡思貝,表示唔鍾意睇佢演戲,其中一條留言「樂小姐,別找蔡思貝演戲,內地人不喜歡她,會影響收視率,不信你可以做個調研」更超過1.6萬個讚好,及過千網民留言附和,例如「萬分支持」、「群眾眼睛是雪亮的」、「哈哈哈大家都不喜歡」、「雙手雙腳贊成」、「真的!!!有蔡思貝我就不想看」及「非常同意,一部新戲的期待值會因為蔡思貝而浮動」等等。不過亦有網民留言支持蔡思貝:「樂小姐,你千奇(祈)唔好信d講國語的話唔鍾意蔡思貝的留言,我們兩廣都十分喜歡蔡思貝果(嗰)次睇完蔡思貝去英國果(嗰)旅遊節目,我就決定第時要搵個蔡思貝一樣的女朋友,麻煩你辛苦晒打擾咗樂小姐啦」,不過呢條留言只有三百幾個讚好,相差甚遠!
樂小姐之後出超過10個PO,依然吸引唔少網民留言表達對蔡思貝嘅不滿及反感,例如「認真不喜歡蔡思貝」、「我們只要有蔡思貝的電視都不看」、「周圍的人沒個喜歡蔡思貝的 千萬別走她拍戲」、「萬人血書請求tvb棄用蔡思貝」及「樂小姐,真心可唔可以唔好再捧蔡思貝?!」等等。
蔡思貝有份主演嘅劇集《飛常日誌》正在播映中,佢喺出席公開活動時亦有被問及呢件事,而佢就話自己都有留意到,不過負評都唔係第一日出現,所以佢希望可以透過作品去拎大家改觀。當時就有記者表示呢條留言超過6千個讚好(而家超過1.6萬個讚好),蔡思貝就話呢個世界超過6千人。另外,對於點解內地人對佢咁不滿,佢就話自己都好想知道原因。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!