樂觀抗癌 ｜文頌男單親家庭成長曾叛逆迷失 29歲生日盼盡快康復

J2節目《不正常愛情研究所》主持之一嘅文頌男（Koba），去年年底自揭喺椎間近盤骨附近位置確診惡性尤文氏肉瘤，需全面停工休息及接受治療。喺較早前，樂觀抗病嘅Koba再出PO分享最新病況，指經歷五次化療後，醫生宣佈治療無效，腫瘤唔單止冇縮小，反而仲變大咗，令佢大受打擊。噚日（26日）係Koba嘅29歲生日，佢喺接受傳媒訪問時指由於係單親家庭成長嘅關係，佢試過叛逆同迷失，所以好希望可以係餘下嘅日子好好活下去。

文頌男嘅爸爸喺佢12歲嘅時候就因外遇離家出走，仲要留低債務俾佢哋。媽媽自此母兼父職，日打幾份工，獨力養大佢同家姐。不過當時佢少不更事，年青時試過叛逆及中途輟學，好彩佢及時迷途知返，努力讀書，最後成功獲得藝術管理及藝術教育雙學士資格，並加入娛樂圈發展。

喺接受傳媒訪問時，文頌男雖然精神唔錯，不過體重就跌咗唔少，由55公斤去到而家嘅46公斤。被問到最新嘅病情，佢就話而家只係剩返做電療，而效果就係未知之數，醫生亦有同佢講過呢個病5年內嘅存活率係6成左右。

除咗要面對病情及副作用之外，當佢提及媽媽時都忍唔住喊，因為佢話媽媽已經年過60，不過因為佢呢個病而日夜奔波，除咗要陪佢去醫院同做家務，夜晚又要返清潔工，有時媽媽夜晚仲會自己喊，佢見到都表示好心痛，所以佢好多謝媽媽對佢不離不棄，所以佢都會好努力對抗病魔。

噚日喺佢29歲生日，佢希望自己可以快啲好返，報答媽媽同支持自己嘅網民同朋友。另外，佢仲話好想同媽媽去一次家庭旅行，因為佢一直以為將來有時間，所以都冇重視同家人相處嘅時間。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！