樊亦敏因健康問題令感情無疾而終 主動放手：會諗對方可以有更好選擇

樊亦敏近年憑TVB處境劇《愛．回家之開心速遞》三太搞笑形象成功入屋，並於《萬千星輝頒獎典禮2022》以大熱姿態奪得「最受歡迎電視女角色」獎項。樊亦敏日前接受商業電台節目《星光背後》訪問，與主持梁泰來大談參選港姐因由及感情事，並自爆因自身健康問題無緣與意中人開花結果。

樊亦敏1991年參選香港小姐，雖然賽前獲封大熱，但仍輸畀冠軍郭藹明、亞軍周嘉玲、季軍蔡少芬，僅奪「最上鏡小姐」。樊亦敏坦言當時無諗過選港姐，因為自己喺屋企唔係好講嘢，媽媽提議佢去參選香港小姐，接觸多啲人，於是應媽媽要求參選。對於賽果，樊亦敏笑言未宣布之前直頭覺得自己喺冠軍，認為每個女仔都會覺得自己係冠軍，但其實各有各靚：「入到三甲當然好，入唔到都無辦法。」續指，當年參選港姐係人生一個好大嘅見聞：「因為有郭富城、黎明一齊去瑞士拍外景。覺得唔參加就會錯失好多機會，當年司儀陣容又好強勁，有周潤發先生啊，其實個眼界係大開。」

樊亦敏加入娛樂圈後就戴假髮工作，坦言選完港姐後受免疫系統問題困擾，幾乎甩光頭髮：「如果公司唔係留我，可能我已去咗外國讀書，我諗住去，但因為我每個月都要打針，我唔離得開香港，所以我又擱置咗。」對於被指參選港姐有唔少富商追求，樊亦敏回應指：「港姐會接觸較多廣告商、贊助商，所以嗰陣就會識到一批社會上地位比較高嘅商人，咁因為我又未結婚，啲人見到我成日同呢啲人食飯，就會有緋聞誤會，都唔可以怪人。但你話富商，坦白講，我識好多人經濟能力都唔錯，但你見我都係朋友，到今時今日我都係喺TVB好努力地工作。」

樊亦敏多年來不乏追求者，曾被傳與吳京及何寶生拍拖，但公開過嘅戀愛對象只有何寶生。於訪問中，樊亦敏坦承曾與圈中人拍拖，亦如正常男女一樣諗過係咪要組織家庭，但最終無疾而終，某程度上原來與樊亦敏健康問題有關，樊亦敏認為結婚唔係兩個人嘅事，而係兩個家族嘅事：「先唔好講對方係邊個或者嚟自邊個圈，兩個人喺埋一起係一門學問，我又好奇怪，我識到嘅人都有共通點，一係獨子，一係就係大仔。喺我哋年代，社會風氣認為佢哋有個傳宗接代嘅責任，但我身體唔好，變咗生小朋友會有問題，甚至係非常之難做到呢樣嘢。」樊亦敏續指，會諗對方係咪可以有更好選擇：「佢可以繼續選擇我，但我會覺得：『不如你真係去睇睇，可能有啲嘢你係更加想要。』」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！