歐錦棠講解TVB與亞視騷錢計算方法 自爆最多賺近500萬 揭無綫唔畀爆騷

歐錦棠1990年加入亞州電視成為藝人，2001年過檔TVB，2016年離巢回復自由身，曾拍過《十萬噸情緣》、《誰家灶頭無煙火》、《衝呀！瘦薪兵團》等等；去年更為ViuTV劇集《打天下2》身兼監製、編劇及主演。歐錦棠近年開設個人YouTube頻道《乜乜棠水舖》，日前佢就拍片講解電視台騷錢如何計算及TVB離巢潮嘅真正原因。

歐錦棠解釋指TVB及亞視騷錢計法，自爆曾於1996年奪得「亞視最爆Show藝員獎」：「當年我係做左670個騷，換句話講係爆咗600個騷。咁每個騷，我冇記錯係8千幾蚊，咁你同我計囉。8000幾蚊，爆600幾個，肥過肥仔水啊」。歐錦棠透露於亞州電視工作期間，較容易爆騷。而自己簽約TVB時，歐錦棠表示合約寫住每年有70個Show：「我這麼多年都做足給他，有些會over show，係有兩年減產」；簽約時其實無寫明，但TVB就同佢講今年差幾個，做唔夠，不如將佢撥去下一年，歐錦棠指：「要還嘅，而呢5個係唔計錢嘅，你要做咗畀佢先」。而TVB多數都唔會發生爆騷情況，當藝人差唔多做足數，就唔會再派新工作畀佢。

對於TVB離巢潮，歐錦棠直言其中一個原因就係減騷，當年於TVB工作期間，有同事一年減到6個騷，接著就1年3個騷，最後更一刀切一年一個騷，令唔少同事難以維生，最後選擇離巢。歐錦棠更指，香港電視台與藝員制度無咩彈性，希望讓藝員可以喺不同電視台出鏡。不過，宜家TVB推出與藝人簽一Show嘅方案：「當然省錢很重要，他不用養你，不用給你福利，甚麼Pension那些，甚麼都沒有，你是一個part time嚟。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！