江美儀榮升視后後傳遭TVB冷待 直言今年冇劇拍

現年52歲嘅江美儀從演超過30年，先後效力ATV和TVB，喺今年憑話題劇《下流上車族》飾演車太一角勇奪「最佳女主角」，一嘗視后滋味。不過江美儀喺頒獎禮後，今年暫時只係得劇集《隱形戰隊》及《羅密歐與祝英台》出街，同以往出爐視后獲力捧好唔同，暫時未有獲安排拍攝劇集，而佢喺出席《羅密歐與祝英台》宣傳活動時，佢亦親口承認今年未有劇拍。

江美儀喺《羅密歐與祝英台》中飾演「奸角」杜拉，演技獲得網民大讚，而佢就表示感謝網民嘅支持，並笑話可能劇中得兩個奸角，因為咁就相對突出啲。另外，佢仲話無論係忠定係奸嘅角色，佢都鍾意，最重要係角色本身嘅質量。

喺今年年初舉行嘅《萬千星輝頒獎典禮2022》，江美儀憑《下流上車族》奪得「最佳女主角」殊榮，當時佢喺台上發表感言話：「我冇諗過會攞到獎，以為自己唔係親生女，唔會拎到呢個獎。」之後，佢喺接受訪問時被問到會唔會考慮做「親生女」，不過佢就好似面有難色咁話：「我會叫我經理人同佢傾下，我唔可以放低我經理人，因為咁多年嚟我搵嘅錢又唔係多，佢都冇話嫌棄我啦，一直都陪我，所以我唔可以冇經過佢批准亂咁傾嘢。 」

佢喺接受訪問時坦言「唔係冇乜，係冇！OK嘅，公司安排啦。」，被問到急唔急拍劇，佢就話急都冇用，要等待天意嘅安排，自然會有機會出現。早前有傳佢堅持淨係簽部頭合約，唔做「親生女」而被TVB冷待，佢就表示原本9月會拍新劇，不過劇集因準備問題而延至年尾開拍，而且佢同TVB嘅合約係一年一劇。當被問到會唔會做「親生女」，佢就話唔可以完全唔理經理人嘅感受，同埋而家仲有時間，去到2025、2026年先完約，佢亦滿意現時嘅合作形式，因為自由度比較大。

相反，喺《萬千星輝頒獎典禮2022》憑《愛·回家之開心速遞》三太「白天娥」一角奪得「最受歡迎電視女角色」嘅樊奕敏，佢嘅演出機會比江美儀多，除咗有三套待播劇《本尊就位》、《異空感應》及《奪命提示》之外，佢更獲安排喺新劇《神耆小子》做女一。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！