雅虎香港新聞 【油麻地重建】果欄擬活化 原建築作餐飲藝文用途 商會憂欄商遷新大樓淪「白老鼠」
【Yahoo 新聞報道】市建局早前公佈《油麻地及旺角地區研究》，建議活化過百年歷史的油麻地果欄，原址改為零售、餐飲、休閑或藝術文化用途。九龍果菜同業商會理事長張志祥在果欄打滾逾半世紀，對今次活化計劃疑慮重重，擔心答應搬遷到新大樓的欄商慘變「白老鼠」。他強調並非反對活化計劃，只希望當局多聆聽業界的需要；商會對活化計劃的理解，也與市建局的版本有出入，張志祥指當局從未與商會接洽及介紹新計劃，「我哋都係睇新聞稿」。
記者：Carmen C.
攝影記者：Davies
高峰期欄商近 300 間
張志祥的家族經營欄商生意，笑言「1969年係第一年喺度打工有糧出」，一做便數十年。他指19世紀末油麻地一帶填海後，避風塘及鐵路附近設墟市，其後成為副食品市場，即果欄前身。當年除果菜之外，亦有出售其他農產品、雞鵝鴨及魚類等；直至60至70年代，雞欄及菜欄分別搬至長沙灣蔬菜批發市場及長沙灣臨時家禽批發市場，該址才成為獨立的果欄。欄商亦由最初只有十多個，至最輝煌時期近300個，現時則回落至180個左右。
「以我了解，過百年嘅批發市場，世界性嘅話，果欄喺三名以內㗎喇！」張志祥指果欄過百年來並無大型加建，現今仍保存大部份舊貌。現時油麻地戲院旁、面向窩打老道的欄商，部份在1930年代開業，舊式建築群仍在；石龍街的一排16檔石製兩層高舊建築，屋頂設有水磨石招牌及立體書法字，仍然保存至今，是油麻地果欄的標誌之一。「其實都係好奇特，咁細嘅地方處理咁多生果。」在80至90年代的高峰期，果欄每日處理近200個貨櫃的水果，每日24小時拆箱運貨「不停咁做」。
市建局的活化計劃包括將果欄業務遷至巧翔街，張志祥關注果欄原址建築群外圍的欄商地舖，「咁呢啲又計唔計入果欄（活化）範圍？」張舉例指如果並無明確界線，或有欄商擔心遷至巧翔街後生計受影響，會選擇在果欄原址周邊繼續營運，「啲人為生意，點會唔走返出嚟？」變相亦將願意搬遷的欄商視為白老鼠。
曾以個人名義倡原址活化
張志祥曾以個人名義建議果欄作原址活化，唯一條件是活化期間不能影響營業。他又建議在石龍街以南加建一幢新大樓，地面供受影響欄商營運、地牢設上落貨區，亦可預留一層作水果展銷會等展覽用途，「你話上面再起乜嘢我哋無咩意見」，與果欄舊建築群一同運作，既保留果欄特色之餘，亦可改善果欄環境。
「我哋社區喺度運作，我哋都係一個文化嚟」
研究報告亦提及，計劃將果欄二級歷史建築群，發展零售、餐飲、休閑或藝術文化用途。張志祥質疑再以歷史建築群作藝文用途是否必要，因土瓜灣牛棚活化成效不彰，「我哋社區喺度運作，我哋都係一個文化嚟呀！」油麻地重建計劃尚未正式開展，整個計劃數以年計，張指屆時可能已經退休，但不忘強調「有時一個舊式建築群喺度繼續運作，個收益係會大過一啲新嘅建築物。」
張強調並非反對活化，「我哋係積極配合㖭，但我希望佢哋（當局）了解咗我哋呢個行業嘅需要先」，更直言若果「外行人管內行人」，「永遠唔成功」。他又笑言：「政府搞咁多市場，邊個成功？得一個：證券市場」。
市建局向《Yahoo新聞》覆稱，2019年4月展開果欄保育及活化研究，向逾300名果欄從業員及9000名居民發問卷收集意見，2020年3月已向政府提交結果。至於將果欄二級歷史建築群發展為新的零售、餐飲、休閒及藝術文化等用途，市建局解釋為「配合地區營造手法，強化水果批發零售集中地的地區特色，有助推動旅遊文化產業發展，傳承果欄歷史」。
批發零售分開？市建局：預留新大樓重置批發及零售作業
商會對果欄活化計劃的理解，與市建局的版本也不盡相。張志祥引述市建局《油麻地及旺角地區研究資料手冊》內容，指果欄「批發業務將會搬遷至巧翔街，以促進批發業務的機遇」。業界的理解是把果欄「零售」及「批發」業務分開，後者遷至巧翔街，零售留在原址。張質疑，不少欄商兼營兩者，難以區分，「忽然有一兩個人嚟買一兩盒嘢，咁我係零售定批發？」
市建局則解釋，研究手冊僅闡述成果及建議，並非全文，強調巧翔街大樓將「預留低層以重置現時果欄的批發及零售作業」，果欄舊址亦保留部份生果零售業務，此說法意味部分批發零售業務未必分割。
張志祥從記者口中得知市建局的回覆後反駁，尚未收到有關消息，去年市建局交立法會的文件也指巧翔街新大樓用作水果批發，舊建築群則保留水果零售，「佢咁講就變得好快……有啲奇怪，咁講咩都無用，而家講嘅任何一樣嘢轉頭又話唔係咁」。他續指，暫時仍未有市建局代表向商會接洽及解釋計劃，「乜嘢都無搵過我哋，我哋都係睇新聞稿」。
