雅虎香港新聞 【油麻地重建】見證香港工業起飛至息微 全港最老彈簧工場冀原區搬舖：始終基地喺香港
【Yahoo 新聞・油麻地重建系列報道】一條廣東道，貫穿兩個世界。尖沙咀段五光十色，名店林立；油麻地段像黑白舊照片，滿街五金老店，全港最老彈簧工場「力高彈簧」也座落於此。昔日熱賣的發條彈簧如今無人問津，客人換成家庭客和文青，力高見證香港工業起飛到息微的泛黃歲月。隨著油麻地重建研究報告出爐，廣東道一帶亦有機會受影響，接手經營力高的傳人冀原區重置，守住紮根香港的基地。
記者：Carmen C.
攝影記者：Wildchild
力高彈簧創辦人李先生十多歲做彈弓學徒，30多年前到廣東道開店，由樓梯舖做到開設小工場，製作彈弓逾60年至今年初才退休，老店由三名子女接棒。
訂造彈弓「即接即製」
力高是香港少數仍在營運的彈弓工場之一，提供彈弓訂製服務。舖面放眼盡是黑壓壓的彈弓，不同款式的彈弓及原材料擠得密密麻麻，李二小姐再三叮囑記者在店內小心行走。
穿過「彈弓陣」就迎來數部製作彈弓的機器，有急單就「即接即製」。李二小姐解釋，現時不少人或經「淘寶」購買雜項配件和五金用具，但仍有些客人如電梯維修工人，需要短時間內尋得合適彈簧，「即接即製」服務還是有一定需求。即使營業時間已過，每遇緊急情況，「我哋都會開返門畀佢」。
90 年代最輝煌 「啲客一個個棟晒喺門口」
兩位李小姐憶述，90年代是彈簧工場最輝煌的時期，各類五金店互惠共生，互相提供訂單及配件，例如發條彈簧就是鑽床必備的配件，成為該店當年依賴的收入來源之一，「無咗佢哋（發條訂單）我哋又唔得，佢（鑽床師傅）無咗我哋又有啲麻煩」，一環扣一環，工業如是，廣東道亦如是，「基本上全香港人都知呢條街可以買齊晒啲五金配件、機械用嘅嘢，啲客會放低個辦，喺附近五金舖買齊晒啲嘢再過嚟攞貨」。記者問，最高峰時期每日售出多少條彈弓？李二小姐笑著拿出一袋超迷你彈弓，「呢袋入面有十萬條」，又從內執起一把，「我手上應該就有幾千條喇！」每天售出彈弓數之不盡，較明顯的生意指標是店門前的人龍，「啲客係會一個個棟晒喺門口，交低條辦、排住隊入嚟買」，那時候工場內的機器不時通宵運作趕製彈弓。
家庭客增多 「做功課要買彈弓」
李大小姐在油麻地成長，小時候放學後在工場「打躉」，長大後亦成為「油旺地膽」，每日回工廠時，「行出行入都會打招呼say hi，由街頭hi到街尾」。她笑言這條五金街周一至六是「中佬聖地」，「好多人專登嚟買嘢」；李二小姐亦嘆謂：「以前呢度停車都停唔到，依家你見都有吉位」。隨著香港工業息微，鑽床發條仍然一束束掛在工場內，卻無人問津。近年多了一批家庭客為了STEM功課而來，「有啲爸爸帶住個仔，問星期日開唔開門呀？做功課要買彈弓」。她們亦到觀察到近年吹起手作風，把年輕人「吹」到這條五金街。
「重建係一定走唔甩」
今年初，市建局公佈油麻地及旺角地區研究。春去東來數十回，位於廣東道的力高彈簧工場或受市區更新發展計劃影響。李大小姐已有心理準備，「行開行埋都見有幾個地盤重建緊，我哋都大約估到，重建係一定走唔甩嘅，爭在幾時會發生」。
有客人亦曾提及「到時呢度重建咗或者清拆咗，都唔知去邊度搵返啲買彈弓嘅地方喇！」故姊弟三人亦希望，若然受重建影響，往後可在附近重新開設門市。她們強調，售賣和訂製彈弓需要專業度尺，門市對客人非常重要，「我哋嘅基地都係喺香港，最主要要望返啲五金舖搬去邊度，其實都考慮返聚埋一齊」。在時代的洪流下，廣東道五金街又能否延續下去？
市建局覆稱，油旺地區研究中建議保留四條特色主題商業街，即花墟、通菜街、 花園街及廟街。至於區內其他特色店舖，市建局會在開展個別項目時按情況協助。市建局續指，研究報告中提出的「發展節點」屬於發展概念及願景，「具體落實及執行仍要與不同政府部門商討」。
「全民保育行動」袁智仁就指，油旺每條街各有特色，店舖組成了網絡：甘肅街賣蛋、近大角嘴一帶賣建材等。他強調，保育的意義並非單單保留某些建築物，需顧及街道特色及功能性；梧港過往有舊建築保留後，卻迎來與建築本身無關的行業，「同個地方係無咩關係」，擔心油旺重建步其後塵。袁強調，社區如有危樓亦會自行淘汰維修或重建，毋須一刀切大範圍重建，「要搬成四五百間舖，佢哋點搬？」
力高彈簧
地址：廣東道 939 號
