法言人｜27歲容天佑憑武打戲彈起成功入屋 網民：打得好好睇

TVB熱播劇集《法言人》今晚（12日）將迎來大結局，劇集自播出以來廣獲好評，唔少演員更成功憑角色人氣急升，當中包括飾演見習師爺「Tony仔」嘅容天佑。

現年27歲嘅容天佑，16歲時參加節目《功夫新星》獲得季軍，獲TVB簽Part-time演員約，去到18歲投考藝員訓練班正式加入TVB。雖然佢已經入行12年，不過演藝事業都未見有太大起色，多年嚟都係飾演唔起眼嘅角色居多，但係佢冇選擇自暴自棄，反而視每次工作係一個學習嘅機會。去到2020年，佢成功憑《迷網》中飾演因籌措爸爸醫藥費而成為網絡騙子嘅窮編劇軒仔；及早前喺《隱形戰隊》中飾演鹹濕仔Billy，成功獲得網民關注。

睇得又打得嘅容天佑喺《法言人》功架十足，原來佢4歲已經開始接觸跆拳道，擁有黑帶四段；去到8歲轉學截拳道，仲係李小龍創立嘅截拳道第五代傳人。佢喺《法言人》喺劇集中飾演見習師爺「Tony仔」有唔少打鬥鏡頭，例如使出「逆天」跳躍起飛腳教訓「躁狂男」楊證樺；為救被星探社禁錮嘅Alice（何依婷飾），而與大漢及Ada（楊梓菁飾）發生激烈打鬥。劇集出街後，唔少網民紛紛留言大讚好型及精彩，例如：「有你出現嘅戲，我都有留意你，繼續努力 沒有白費，支持你」、「好型呀！Tony仔做得不錯，好自然，希望多啲導演俾機會。」、「希望今次你紅得起啦，你都出道咗好耐」、「俾Tony仔啲飛踢吸引到，型」及「打得好好睇，特別係踢腿」等等。

至於感情方面，容天佑喺入行初期曾與林穎彤拍拖兩年，期間離離合合，有傳當時林穎彤媽媽極力反對戀情，原因係嫌男方太奀，耽誤女兒嘅事業發展，曾兩度棒打鴛鴦。而現時容天佑已有一個穩定嘅圈外女友，佢仲不時喺社交網站上載靚相放閃。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！