洪朝豐發文寫「再會了」惹擔心致歉 當年「洪寶戀」一度成為城中話題

曾經係電台DJ嘅洪朝豐，經歷多年高低起伏後，近年居於海外，並不時喺社交平台發文。尋日洪朝豐發表以《再會了》為題嘅散文，寫道「永別了，我的朋友，我的心情，你不會知道。」及「再會了，三千大千世界」，令外界擔心洪朝豐嘅情況。

後來洪朝豐再次發文澄清，並為文章引起揣測致歉。「剛才有好朋友很緊張的打電話找我，說怕我自殺。還有許多我的朋友也很緊張。連內地和海外的朋友也很緊張。不少臉書朋友亦很緊張。」、「感謝大家的關心。是的，這只是一篇剎那間的創作。也許我在欣賞死亡文學之美。唯有經歷過生死，才能如此隔岸觀火，觀照死亡與別離。不用擔心。再說一聲：抱歉，不好意思！」。

64歲嘅洪朝豐大學畢業後加入港台主持古典音樂節目，後來調任負責黃金時段節目《日月星辰》等，1997年被新城高薪挖角過檔。洪朝豐1998年喺新城訪問寶詠琴時擦出火花，其後高調公開戀情，但未夠一年就分手收場。「洪寶戀」一度係城中話題，分手後更演變成罵戰，洪朝豐更多次謾罵寶詠琴，更揚言「一隻手指捽死佢」，同過去溫文爾雅形象大相逕庭。後來洪朝豐承認患有情緒病致言行失控，一度要入院治療。2017年洪朝豐因為舌底發炎而求醫，後來證實患上舌癌，需要切除部份舌頭及接受電療。

洪朝豐大學時期認識前妻葉桂好並育有一子，葉桂好經營嘅洪葉書店正正以二人兒子名字命名，但洪朝豐同葉桂好婚後6年決定離婚。洪朝豐治療舌癌時情緒再受困擾，離婚30年嘅葉桂好同洪朝豐再次同住提供照顧。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！