涉JPEX風波 陳怡獲釋後拍片講拘留體驗 提起飯盒想嘔 強調唔係大件事

虛擬幣平台JPEX被證監指無牌經營之後，警方本周初拘捕6男2女指佢地涉嫌詐騙，被捕者包括林作同KOL陳怡（陳穎怡）。各人已經獲准保釋，而陳怡獲釋後就喺社交平台發文話「老娘回來了」，並預告會出片講述被羈留嘅過程。

而陳怡尋日下晝上載片段，標題已經講到「保釋金100萬」。陳怡喺片段開頭就表明唔可以講案件細節，但有好多周邊事分享。佢話因為睇戲見過唔少被扣留時會見到嘅情境，所以冇好驚或者唔開心。去到俗稱「臭格」嘅羈留室，陳怡覺得比想像中好，甚至好過一般人住嘅地方，因為有冷氣有床，但「臭格」長期有大光燈照住，如廁時又會被人望見。陳怡又話同律師嘅對話都係好似電影咁。

但係講到膳食就唔同嘞，陳怡話佢得到嘅飯盒連睇都唔想睇，因為裡面係得白飯、幾塊椰菜同一舊雞蛋，仲話講起就想嘔。

陳怡自言好配合警方，因為覺得警方都要交差，仲強調件事唔係咁大，所以佢可以保釋，否則已經被拘留直到上庭。唔少fans都擔心陳怡，反而佢本人就好有信心冇事，因為知道自己做緊咩，甚至亦不忘喺片中大鬧「證貪」……

有網民見到陳怡被捕時個樣，都話點解同平時拍片咁大落差，陳怡話當知道被捕後會被扣留，只考慮到衣著要保暖，亦冇時間化妝整頭，又證實警員帶走嘅名牌手袋都係佢嘅。

後來陳怡深夜再拍多條片，主要安慰fans，話而家個人成熟咗又有一定財力同閱歷，對比2019年評論社會運動後同到嘅負評，而家只係小兒科。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！