港女講日：大男人也有自卑時 日本男生十大「自卑之處」

日本男人有幾大男人，相當大家都聽過，但事實上佢地壓力真係好大。每個月份糧要比晒老婆，養起成家之外，仲要應付階級觀念極重嘅上司，收工仲要陪飲，好多時真係有冤無路訴架。最近，日本網站《R25》最近就訪問咗200名20到29歲嘅日本男性，並數出令佢地產生自卑感的10樣嘢，當中人工低都只係排第六，而佢地最介意竟然關乎種族問題，一齊睇下！

第十位：無fd子

正所謂出外靠朋友，如果一個人朋友多，自信心自然都會多啲，有咩事起上嚟都有人撐你，自然覺得自己比較重要，自信心就返晒黎啦。

第九位：寫字核突？

呢個真係地區性問題，日本人出晒名要求高，寫字都認真過人吖，相信如果係香港人嘅話，應該會變成口才好唔好。

第八位：唔識應酬？

正所謂出得嚟行，預咗要煩，應酬交際呢啲嘢， 表面上睇落去好容易，但要做起上嚟真係唔係個個都可以八面玲瓏架，尤其是日本男人識唔識應酬，直接反映工作能力，介意都唔出奇呀！

第七位：唔識畫畫？

日本人著重美感同藝術文化，緊係介意自己無藝術天份，如果唔識畫畫，好似唔似日本人咁。

第六位：人工低

呢個擔心相信香港男士一定深深體會到。日本男人絕對係成家的經濟支柱，如果老婆都要出嚟打工，會比三姑六婆講是非，間接話男人無能，都咪話唔大鑊。

第五位：禿頭

呢樣嘢可以話係所有男人最驚嘅事，好多人話窮都唔緊要，最緊要有頭髮。尤其人到中年，容易脫髮，萬一變到禿頭，真係邊到都唔使去。

第四位：唔靚仔

正所謂姻緣天注定，好醜命生成，呢啲嘢睇開啲好。不過講真，其實只要落多啲心機去執下個look ，搵到適合自己嘅風格，總有日本妹識欣賞 。

第三位：小肥

呢樣野男人又真係諗太多，好多日本或香港女生都鍾意小小肥嘅棉花糖男孩，因為如果男仔身形太瘦削，係好難畀到安全感女仔。但如果真係下定決心想改善自己身型，不妨坐言起行做多啲運動。

第二位：太多體毛

體毛多，汗流量多，比人感覺唔夠乾淨，而且好易有體味，好多女生都唔鍾意。其實宜家好多激光脫毛公司都有開發男性市場，有需要可以去「搞搞佢」。

第一位：我沒有六呎高

估唔到日本男生最介意嘅係佢地嘅身高，雖然坊間有唔少全球身高排行榜，普遍日本人仍較中國及韓國人矮，但佢地近百年的身高增長速度亦非常驚人，相信同每日一杯牛奶同勤做運動有關，相信好快佢地唔使再為身高而自卑了。

相片來源：shogolia ＠tumblr