港姐冠軍宋宛穎首次拍劇 加入《愛回家》即獻螢幕初吻

無綫處境劇《愛·回家之開心速遞》長拍長有，劇集不時會加入新人，除咗為觀眾帶嚟新鮮感之外，同時亦可以給予新人機會。劇集最近又有新人加入啦！佢就係飾演《渣流灘》美術指導Tiffany嘅2021年香港小姐冠軍宋宛穎（Sabrina）。

《愛·回家之開心速遞》喺噚晚（5日）播出嘅劇情就講到Candy（葉蒨文飾）經常為朱Ling（吳偉豪飾）炮製「愛心麵包」，仲認為同朱Ling有機會發展。朱Ling主動約Candy食飯，仲帶佢去飾物店揀手飾。Candy以為朱Ling買禮物比佢，不過原來只係叫佢幫手揀手飾，而佢送贈對象係另有其人。片場嘅新嚟美術指導Tiffany（宋宛穎飾），令導演朱Ling甚為心儀，之後佢哋仲喺道具走馬燈嘅月色燈影下親吻咗一下，而為朱Ling不辭勞苦搵走馬燈作道具嘅Candy亦見到二人親吻，令佢非常傷心。最後，Candy同書蟲（林浩文飾）喺元宵佳節下成為天涯淪落人。

現年23歲嘅宋宛穎係中葡混血兒，2021年以黑馬姿態艷壓群芳獲得港姐冠軍，佢加入TVB後工作量唔算多，只為《萬千星輝賀台慶》、《萬眾同心公益金》、《明愛暖萬心》大騷擔任司儀及為《新春開運王》及《北京冬奧》等節目擔任主持。另外，佢亦喺當選港姐冠軍後便開始小紅書帳號，不時上載烹飪、工作及扮靚心得等等同內地網民分享。講得一口流利而又標準嘅普通話嘅Sabrina，上年更拍攝內地真人騷節目，北上工作三個月。最近Sabrina終於有機會拍劇，正式加入《愛·回家之開心速遞》劇組，第一集出場就已經有唔少戲份，仲獻上螢幕初吻，同吳偉豪有咀戲。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！