【港姐】鬼鬼地有著數？謝嘉怡以外 盤點歷屆8位洋味港姐

來自蘇格蘭的中英混血兒謝嘉怡當選2020年度香港小姐冠軍，其實由初選到決賽謝嘉怡都可以話係一路跑出，畢竟「洋味」美女向來都係港姐熱門。歷年來仲有邊幾位「鬼妹仔」佳麗？

陳凱琳（2013年冠軍）

加拿大長大嘅陳凱琳經常被人誤以為係混血兒，Grace亦都多次否認，要澄清係父母親生。但係陳凱琳同細佬都真係好似外國人，基因真係好神奇囉！

雷莊𠒇（2017年冠軍）

都係冠軍人馬，都係來自加拿大，睇落鬼鬼地嘅雷莊𠒇一樣唔係mix嘅！

左慧琪（2002年亞軍）

左慧琪係當屆其中一位熱門，爸爸係英藉警司。左慧琪曾於TVB參與幕前演出，但因為唔識中文，冇耐就解約返英國。

保采芬（2002年入圍）

2002年呢屆走漏眼嘅一位，而家睇返有幾分似阿Sa！由於當屆佳麗質素一般，保采芬都係搶眼嗰批，但係決賽表現平平，最後五甲不入。因為係鬼妹仔，梗係獲安排參與明珠台活動，後來銷聲匿跡。

嘉碧兒（2002年最後5強）

2002年呢屆寧舍多「洋妞」！中葡混血嘅嘉碧兒，多得姨媽係前港姐唐麗球，入圍後備受注目，不過最終三甲不入，但係反而有機會極速出鏡，包括擔任《勁歌金曲》主持。同佢左慧琪一樣，好快就同TVB Bye Bye，返回美國讀書，畢業後喺當地發展演藝事業。

活麗明（1994年亞軍）

堪稱水準不俗嘅一屆，活麗明以均勻身型加埋甜美笑容，力壓大熱張可頤同黃釲瑩。同前面幾位一樣，廣東話麻麻地嘅阿Wood無喺娛圈長期發展，最大收獲可能係識到老公、明珠台前主播陳忠偉。

高麗虹（1984年冠軍）

高麗虹爸爸係意大利裔澳洲人，曾任港英政府官員，1984年參選港姐奪冠。後來轉投影圈，拍過多套動作片，因此結識大哥洪金寶，後來二人共諧連理。

狄寶娜摩亞（1981年季軍）

18歲參選，本來只得「青春小姐」獎，後來因為冠軍羅佩芝虛報年齡被取消資格，狄寶娜摩亞獲擢升為季軍。睇落係外國人，但係喺香港長大，廣東話好流利，所以入行後有機會喺翡翠台做主持。90年代移居加拿大，而家喺當地中文電台開咪做主持。