港姐︳父母開補習社疑呃錢走佬 苦主聲稱王怡然一定知情

估唔到今屆港姐戲肉唔係決賽，而係選完之後嘅新聞。先有落選佳麗胡睿涵Hanna出post暗寸莊子璇扮晒嘢，然後莊子璇再被爆係福建同鄉組織嘅「監事」。而亞軍王怡然就被爆參選前拍過片惡形惡相鬧香港餐廳侍應，仲被傳喺內地經營補習社嘅父母，涉嫌拖欠薪金兼呃家長錢，帶埋個女嚟香港避風頭，王怡然日前出席活動時表示唔清楚同唔方便透露太多，講講下仲激動痛哭！

TVB日前回應時話，傳言未經證實，因此拒絕回應。但有傳媒搵到聲稱受王怡然父母騙財嘅受害人，仲大爆王怡然係補習社老師之一，唔會唔知情！

喺天津嘅苦主向媒體表示，2019年8月與王怡然父母王召軍與王倩開設嘅補習社漢普森英語簽訂合同，安排兒子以一對一形式上堂，費用超過4萬2千元人民幣。2020年苦主再付款購買網上一對一課程。但係到2021年8月，苦主有一半實體課堂未上，學校通知要改為網上上課。苦主拒絕接受並要求退回餘款2萬幾蚊，但係補習社負責人一直無回應。苦主之後入稟天津法院要求漢普森英語賠償，法院駁回起訴，但認為事件有刑事成份。而有補習社前員工爆料，聲稱王召軍與王倩嘅公司因經營不善而倒閉，受害家長估計4百幾人，損失幾千至十幾萬人民幣不等。

家長受害之餘，報導又指王怡然父母仲拖欠員工薪酬。內地唔少家長同補習社前員工直到睇到今屆港姐消息先知，王氏一家三口原來去咗香港。受訪苦主仲話，王怡然有喺漢普森任教，認為佢參與其中，對父母嘅事應該知情。

根據內地企業背景搜尋器資料，王召軍與王倩嘅公司處於「經營異常」狀態，並列為「失信被執行人」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！