澄清同初戀張衛健分手真相 江欣燕自爆奉子成婚嫁吳積遜 婚前流產極崩潰

56歲嘅江欣燕（欣欣）唔經唔覺入行38年，喺電視由靚妹演到近年做人媽咪，早前佢接受商台節目《星光背後》專訪，談及復出後由主角變配角再演母親角色嘅心路歷程外，仲自爆同張衛健嘅五年初戀，以及與前夫吳積遜(Jackson)由結婚到離婚鮮為人知嘅經過。

欣欣指初戀情人張衛健係早佢一屆嘅新秀冠軍，而欣欣同屆嘅吳國敬係健仔小學同學，比賽期間張衛健去探班，雙方因而認識，健仔亦展開追求，但呢段情一直備受欣欣父親反對。「因為當時我太細個，會認定佢教壞我，會認為如果我地冇拍拖，新秀比賽結果會好啲」，但欣欣唔認同，因為自己根本冇學唱歌，亦唔打算做歌手。最終欣欣同健仔分開，多年來流傳嘅原因係雙方事業上有差距，但欣欣指最後只係因為雙方工作繁忙，令佢先提出分手，仲強調係和平分手。

後來江欣燕遇上商人吳積遜(Jackson)，拍拖十年後喺2001年結婚，婚後欣欣一度淡出幕前做闊太。欣欣首次披露當年嫁俾Jackson原來係奉子成婚，佢憶述話「最初係驗孕捧兩條線中咗，daddy好開心，個個都話結婚啦，Jackson又訂到生日嗰日嘅場地」。但懷孕未夠三個月時，欣欣忙完父母結婚周年party後，有日企高拎嘢感到雙腳乏力，再搵醫生檢查之後，先發現胎兒沒有生命跡象。江欣燕直言對小產「接受唔到，好失望，咁仲結唔結婚呢？但我已約了周刊做結婚專訪」。欣欣指結婚表面開心，但其實情緒崩潰咗一排。

江欣燕同Jackson結婚12年後宣布離婚，但外界一早猜測欣欣復出拍劇時婚姻已經亮起紅燈。佢重申離婚與第三者無關，而係「同呢個人都相處咗二十年覺得悶」。至於復出只係唔想再過糜爛生活，當時雙方關係仲好好，直到2007年欣欣返TVB拍《畢打自己人》時搵返工作嘅開心，「感覺有返自己世界，一個人更加開心，就不如分開」，喺2013年拍《女人俱樂部》時欣欣決心離婚。訪問中江欣燕直言享受單身嘅自由，亦未打算搵新對象。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！