炎明熹「紅鶴」裝被批時裝車禍 時裝設計師鄧達智指原來衰呢樣

《萬千星輝頒獎典禮2023》前晚（14日）於澳門圓滿結束，各個獎項結果塵埃落定。台上鬥得激烈，台下亦然，一班花旦們喺紅地毯互相爭妍鬥麗，當中以18歲樂壇小天后炎明熹（Gigi）討論度最高。今次炎明熹再度作出新嘗試，大膽地以黑色性感內衣、白色長身襯衫配搭紅色半身裙及絲襪亮相，不過咁樣嘅搭配加埋件白色長身襯衫有陣去動漫節嘅Cosplay味，仲被指好似隻紅鶴，慘遭狠批「時裝車禍」。

對於炎明熹嘅連環「時裝車禍」，有傳媒就搵嚟知名設計師去評價出事主因。著名時裝設計師鄧達智（William）就表示自己曾經見過佢，覺得對方有禮、青春及清純，仲激讚佢才華洋溢，可惜佢嘅造型連番失手，希望佢可以有一隊優秀嘅團隊為佢打造形象。

William指佢呢排聽到好多對Gigi打扮上嘅負面聲音，而家佢細心睇之下就發現好大問題。佢仲指好多香港人對Gigi有好大嘅期望，而佢自己亦好欣賞及器重對方，原因係喺新一代歌手中，Gigi係有條件去一個好高嘅位置。佢冇直接講套衫好唔好，只係話如果唔係Gigi著嘅話，佢會覺得係垃圾堆填區。

之後，William再話Gigi係TVB重點栽培嘅種子，所以一定係會有團隊幫佢，無可能會將佢搞成咁。佢認為Gigi過往嘅形象唔統一，唔係妖女，唔係貴婦，一時仲變咗「cheap版麥當娜」，仲話Gigi嘅形象係好好做，因為樣靚又夠高，唱歌仲好好聽。如果Gigi真係要重組形象嘅話，首先應該由髮型及化妝開始入手，要有自己嘅個人風格。去到服裝方面，佢認為Gigi可以行青春及優雅路線，唔需要太快行成熟性感路線，因為暫時唔適合用性感包裝，行類似Alexander McQueen嗰類young得嚟低調就可以。

而時裝設計師何國鉦亦有指新一代造型設計師仍需努力，因為佢認為Gigi可塑性好高，可惜以往已經多次出事，主要原因係暴露咗兩個比較蝕底嘅地方，上圍唔豐滿，同埋坐圍大兼大腿粗。同時佢仲話Gigi就讀理大攻讀時裝設計，有自己嘅fashion sense，所以可以喺造型上提供意見，估計係Gigi太聽話而出事。

至於星級形象指導郭慶彬（Ricky Kwok）就用「好驚嚇」及「極度唔掂」去形容Gigi喺紅地氈上嘅造型，並話Gigi把聲靚，身型又好，可惜著呢套衫令佢好失望。Ricky Kwok認為Gigi而家好後生，唔需要着得咁成熟同露太多。

唔少網民都留言表示認同佢哋嘅講法，例如「見到D 時裝師 好有心機比有用建議 TVB 個D係咪真係咁廢」、「平時D designers 邊得閒比咁多意見 對炎嚟講係好事嚟」、「講得幾中」、「衰啲講句 佢著校服仲加好」、「不過佢嘅造型師真係垃X圾」、「雖然我係撐gigi 但呢幾次真係差啲」及「睇標題以為鄧達智評得好mean 睇埋內文先知原來佢幾客氣幾有心比意見」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！