炎明熹秘密北上參加《聲生不息》 網民：呢啲機會好多歌手恨都恨唔到

炎明熹（Gigi）憑TVB歌唱選秀節目《聲夢傳奇》跑出，與姚焯菲（Chantel）、鍾柔美（Yumi）及詹天文（Windy）組成女團After Class，日前After Class聯同王灝兒（JW）舉行《Concert"WFH"》線上音樂會，不過就獨欠炎明熹一人；而原來，炎明熹已秘密離港赴長沙參與TVB和芒果TV合辦嘅大型綜藝節目《聲生不息》。

炎明熹日前完成三個星期隔離檢疫期，離開酒店時被內地「Gi炎粉」野生捕獲並拍下多張照片及影片分享到社交平台；炎明熹全程不但微笑回應粉絲，又伸手扶起跌倒嘅粉絲。據悉，《聲生不息》首集錄影已於前日（27日）完成，不過炎明熹歌唱老師高晨維就喺IG寫道：「只是想告訴大家，我在香港」，令一班香港「Gi炎粉」擔心炎明熹獨自一人未必發揮到最佳表現，紛紛留言：「這樣我很擔心Gigi只能孤單作戰，還要演唱一些勁唔熟的舊歌，她身邊只有姑丈是在音樂方面幫不了她」、「好擔心Gigi，面對陌生環境咁大個舞台冇人幫到佢發揮最好一面及減壓」等等，又有粉絲叫高晨維傳話畀炎明熹叫佢盡力而為就得。

對於炎明熹北上參賽，網民持不同意見，部分網民就留言指呢個係好機會：「佢唱功真係可以同嗰啲中國好聲音睇齊」、「醒目，趁後生開拓定大陸市場」、「呢啲機會好多歌手恨都恨唔到」等等；又將炎明熹同鄧紫棋（G.E.M.）比較，留言指：「我覺得Gigi仲好過阿G.E.M.，Gigi形象好過鄧紫棋，冇咁多負面新聞，唱功好過G.E.M.」、「就算宜家無佢咁好，過多一兩年一定超過G.E.M.」，不過都有網民指炎明熹比唔上鄧紫棋。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！