為救太太跌斷骨 蔡瀾現身大馬 爆粗笑罵黃霑倪匡「走得咁快」

「香江四大才子」之一嘅食家蔡瀾，今年三月因為跌倒受傷而休養，久未露面之餘亦未再更新社交媒體，令唔少支持者關注蔡san 嘅狀況。但原來蔡瀾日前飛到馬來西亞吉隆坡出席自己嘅慈善書法展開幕活動，息影多年嘅紅姑鍾楚紅更飛到當地撐場支持。

蔡san 活動當日坐輪椅現身，即使身在天氣炎熱嘅大馬仍然身穿黑色大褸同頸巾，雖然睇落無以前咁精靈，但腦筋依然靈活。喺活動嘅座談會上，有人問蔡瀾如果見到逝世嘅好友倪匡同黃霑會有咩想講，蔡san 笑住爆粗話會同二人講「我x你老x！走得咁快，唔等我一齊！」。

談到跌倒受傷經過，蔡瀾話係因為曾經跌親受傷嘅84歲太太再次跌倒，佢呢次為咗救妻而跌埋一份，結果太太傷勢無大礙，但蔡san 就「骨頭斷晒」。向來樂觀豁達嘅蔡瀾自言康復過程「好慘」，要食「逼你痛」（止痛藥）。另外有網友喺抖音post片，話喺大馬遇見蔡瀾，並由一位男士推住輪椅視察食肆。

蔡瀾3月底喺社交平台嘅日記表示，由於身體抱恙而暫停。到4月中蔡san 再發文交代，指自己「跌了一跤，把股頸骨摔碎了。醫生即刻為我換了一塊金屬的，當今在醫院休養」。蔡瀾又說「這一病，手尾很長。我心情也不佳，不想做任何事，請大家原諒」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！