無懼港台疑封殺MIRROR Edan呂爵安Jer柳應廷接連出新歌夾攻炎明熹？

之前有報導話港台人事變動之後，MIRROR成員嘅單飛作品如姜濤嘅Dear My Friend, 、陳卓賢(Ian)嘅《搞不懂》、Anson Kong x Lokman《虎道門》等，即使喺其他排行榜以及Youtube都有唔錯嘅成績，但全部喺港台嘅《中文歌曲龍虎榜》無影，恐防連年尾頒獎禮都未必有份！不過似乎冇影響MIRROR成員推出作品嘅部署，為其他傳媒頒獎禮做靚成績。

早幾日Edan(呂爵安)喺IG 限時動態post出為新歌錄音嘅相，為Edan前2首歌填詞嘅Wyman都出post提到Edan喺中秋節都要錄音，而「爵屎」們亦喺歌迷會組織緊Edan新歌宣傳企畫，似乎好快有得聽！10月出埋第3首歌，應該可以爭取播放率，為Edan喺頒獎禮同其他新人一較高下。畢竟今年Edan嘅新人獎勁敵如MC張天賦、曾比特(Mike）及張蔓姿，喺商台嘅903專業推介各有一首冠軍歌，爭持好激烈，出多首自然贏面更大。

另一位MIRROR成員Jer(柳應廷)亦將會推出今年第3首主打歌，題材會係「重生三部曲」嘅延續。忙於綵排今晚「拉闊音樂會」嘅Jer早幾日亦都喺IG分享錄音情況，見到佢同合唱團體SENZA A Cappella一班成員喺錄音室合照。Jer今年派台嘅《狂人日記》同《砂之器》好受商台歡迎，2首歌都登上冠軍寶座，《狂》更加上榜10星期，累積播放率有機會打入「叱咤十大」，Jer甚至有機會爭奪男歌手三甲。第三首歌嘅成績成為獎項關鍵。

向來TVB《聲夢傳奇》嘅參賽者都被視為係對付MIRROR嘅秘密武器，而聲夢冠軍Gigi炎明熹亦喺上星期推出首支個人單曲《真話的清高》。《真》MV推出一個星期喺Youtube嘅播放次數已經超過52萬。Viu當然唔會坐以待斃，搵教主Anson Lo（盧瀚霆）新歌Megahit迎戰，結果MV推出5日已經有160萬次播放，係Gigi嘅3倍有多！遲啲再加埋Edan同 Jer嘅新歌「包抄」，咁就輪到TVB要諗計回敬嘞。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！