無綫台慶｜顏國樑患聲帶鱗狀細胞癌聲線有變 曾酗酒多年排血尿 離巢教太極有原因

今年係TVB 55周年台慶，上周六嘅《萬千星輝賀台慶》搵返唔少舊人撐場。大台其中一套經典處境劇《香港81》嘅演員闊別螢幕多年，演「順嫂」嘅梁葆貞趁家有喜事由加拿大返香港，順道出席台慶。而喺同劇演市儈經紀陳積嘅顏國樑，亦喺離巢十多年後現身。當晚顏國樑講返當年陳積一角嘅入屋程度，令好多人都唔知佢姓顏！唔少觀眾都聽到顏國樑聲線有變，完show後佢接受訪問解釋，佢患上聲帶鱗狀細胞癌，令佢發唔到低音，目前正接受化療。

顏國樑1981年加入TVB，之前做過港台播音員同埋輔警。顏國樑轉型做演員，係因為同播音班同學潘志文食飯時，已經係當紅小生嘅潘爭住俾錢，仲拋低一句「我搵錢易過你好多」！於是顏國樑由特約做起，再因為TVB幕後人員賞識而簽約，並加入《香港81》。《香》拍足6年之後完結，顏國樑轉組加入《歡樂今宵》並演出長劇《季節》，戲中佢飾演大dee（唐家偉），俾老婆林建明揭發偷食之後被怒摑嗰場都相當經典。

後來顏國樑演過唔少劇集，包括《真情》、《皆大歡喜》及《十月初五的月光》等。顏國樑2008年因演出安排而被幕後放聲氣話佢唔續約，加上通告安排失當，顏國樑決定離巢，轉行做太極老師，並且北上居住。顏國樑喺鄧英敏主持嘅網上節目提到，曾經有一段時間酗酒，後來出現「痾血尿」，以為自己患癌，後來好彩冇事！經此一役後，顏國樑決定戒酒並轉為品茶。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！