無綫新咪神郭珮文加盟《愛·回家》？袁文傑IG Story：片場新成員

TVB處境劇《愛·回家之開心速遞》長拍長有，劇集不時會加入新人，除咗為觀眾帶嚟新鮮感之外，同時亦可以給予新人機會，嚟緊劇集最近又有新人加入啦，佢就係2023年落選港姐郭珮文（Juliana）。

喺噚日（5日）《愛·回家之開心速遞》中飾演潮生嘅袁文傑，上載一張與劇中劇《揸流灘》導演等人嘅合照到 IG Story，相片中驚喜出現郭珮文並寫上片場新成員。睇嚟郭珮文繼《法證先鋒6 倖存者的救贖》，火速加入《愛·回家之開心速遞》劇組，唔知佢有份嗰集幾時出街呢？

落選港姐郭珮文憑澎湃上圍，成為新一代無綫咪神。雖然佢喺《2023香港小姐競選》中五強止步，但原來已被TVB睇中，參選完未夠2個月已獲安排入《法證先鋒6 倖存者的救贖》劇組。喺短暫休息後，佢又有拍劇機會，加入《愛·回家之開心速遞》劇組，係應屆港姐之中最快拍劇嗰個，得寵程度更勝港姐冠軍莊子璇。

其實郭珮文會率先彈起早已有跡可尋；佢參選港姐時已因一頭金髮、好身材及真性情成為大熱，於終極面試中就連曾志偉都大讚：「我都唔記得睇面形，行出嚟我只係睇到57號。」即使郭珮文面對陸浩明提問表現得口啞啞，但曾志偉仍笑到見牙唔見眼，睇嚟相當滿意郭珮文。加上，2023香港小姐結果出爐後，冠軍莊子璇及亞軍王怡然先後被爆出醜聞，前者被指與佳麗不和兼雙面人，又被傳係福建社團聯會骨幹成員；後者王怡然則被爆父母於內地挾過千萬走佬，以及流出曾用普通話鬧爆侍應嘅影片，形象大跌。至於，季軍王敏慈就因為正於北京讀書須兩邊走，應該暫時無瑕分身拍劇，故此形象正面嘅郭珮文上位絕對唔係無道理。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！