熊仔頭復出拍片？宣布2025年新計劃 不忘感謝觀眾：多謝大家仲睇緊FH影片

YouTube頻道FHProduction「熊仔頭」去年1月1日上傳YouTube影片，除咗為自嘲「戴綠帽」而傷害到舊愛Santis及MC（張天賦）道歉，更坦言過往生活僅圍繞拍片和希望得到觀眾迴響而令思想錯晒，失去做影片嘅初心，亦因過大壓力患上抑鬱症及失眠，於是決定休息：「多謝睇左十年！有緣再見。」當時唔少網民多謝熊仔頭陪伴咗10年，亦直言會等待佢回歸，希望將來會見到健康快樂嘅熊仔頭。日前（1日），FHProduction上載「大家好，好耐冇見！」新片，影片長約2分15秒，主角竟然係一年幾無見嘅熊仔頭。

熊仔頭於影片中表示：「大家好，好耐無見，真係好耐無見啦」，續指諗咗好耐呢條片一開頭應該講咩好，結果都係諗唔到，於是選擇直接入正題。原來，熊仔頭係為2025年新計劃YouTube電影《粒粒奇幻記》招募幕前幕後工作人員，包括演員、燈光、美指和音樂人：「根據以往影片，每一條微電影都會有一個主題曲，今次呢個YouTube電影都希望有一首好聽嘅主題曲同好好嘅配樂。」熊仔頭呼籲大家幫手分享影片，同時感謝觀眾：「衷心多謝大家一直以來都仲睇緊FH影片。」

不過，熊仔頭無透露YouTube電影《粒粒奇幻記》主題、劇情大綱等等。從影片中隱約見到熊仔頭身後嘅牆身寫住咗好多句標語，包括「成功：大眾力量」、「咁點解唔搵我做呀」、「驚，for example：以後我車你，但仔唔車呀喂＞你錫咗落嚟呀＞當害怕一個人...」、「最愛嘅人令你傷心，最愛嘅人令你開心」、「...你唔選擇快樂呢？...有一個方法＞離開」等等，未知係與YouTube電影有關定係其他因素。唔少網民都留言表示支持熊仔頭嘅新計劃，仲叫熊仔頭唔好畀咁大壓力自己，要好好享受製作過程。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！