香港必食燒鵝餐廳推介 荔枝柴香煙燻燒鵝、香氣十足陳皮燒鵝

燒鵝皮脆肉嫩又充滿油香，而且肉味香濃，無論平民食店定係高級酒樓都會見到佢嘅蹤影就知幾受歡迎。今期搜羅咗5間餐廳畀大家，睇吓邊間合心意～

元朗米芝蓮老字號 天鴻燒鵝飯店

餐廳於2001年開業，係元朗嘅老字號燒鵝店，連續三年獲得米芝蓮推介，好味又經濟實惠，深受街坊歡迎。招牌燒鵝採用每日由佛山養殖場直送到店嘅黑棕鵝，分批即醃即燒，賣完再燒以確保新鮮。肉質嫩滑醃得好入味，鵝皮油潤脆口，蘸埋老闆秘製醬汁令燒鵝增添風味。溫馨一提想食就要早啲去，夜晚6點幾開始會出現人龍㗎喇～

荔枝柴香煙燻燒鵝 棋哥燒鵝餐室

以荔枝柴香煙燻燒鵝最出名嘅燒鵝店！使用高質嘅荔枝木燻鵝，加上唔同嘅香料，可以去腥之餘燒鵝會散發淡淡荔枝木嘅清香同煙燻香氣，好獨特。而且皮脆肉嫩，入口充滿鵝油嘅香氣兼啖啖肉，無論套食或嗌套餐開心share都令人盡興。

黑鬃鵝炮製 波記燒臘粉麵店

9年獲得米芝蓮推介，屹立西環數十年嘅燒臘粉麵店，係區內人氣小店。想食鵝一定要午飯時間到，鵝髀色澤超靚，上枱時滿滿油光，皮下油脂恰到好處，唔算係好肥嗰種，所以唔會有好油膩嘅感覺，分量亦都係滿滿咁覆蓋住成碗瀨粉，一啲都唔吝嗇。

皮薄香脆 大壹燒鵝

位於美食集中地登龍街，馳名燒鵝皮薄身脆口，鵝肉嫩滑多汁，味道有層次，唔會有好重嘅調味，伴以榨菜絲代替油菜，更加爽口惹味。鵝片飯都唔錯，比較薄身但仍然有鵝肉嘅芳香，同埋淡淡嘅炭燒香味，連埋榨菜絲同鵝肉汁送飯，一啖入口超正呀～

香濃陳皮燒鵝 榕哥陳皮燒鵝

尖沙咀令人驚喜嘅燒鵝店，招牌陳皮燒鵝好肥美juicy，油而不膩，而且燒鵝皮燒到脆卜卜，好惹味，就算唔蘸汁都好啱送飯。而且佢嘅燒鵝用陳皮醬醃製，有一種清香嘅陳皮香，令成隻鵝更有層次，好特別。

文：Yanica
編：Cathy